'मॉनेटा'मध्ये स्टार्टअपची मांदियाळी

सध्या सर्वत्र स्टार्टअपचं वारं वाहतय. अशात विद्यार्थ्यांना स्टार्ट अपविषयी मार्गदर्शन करण्यासाठी पोदार कॉलेजचा 'मॉनेटा' हा फेस्टिवल सज्ज झालाय. या फेस्टिवलमध्ये कोणत्या गंमतीशीर स्पर्धा आणि मार्गदर्शनपर कार्यक्रम होणार आहे, याचा घेतलेला आढावा.
आदेश पुरंदरे, कॉलेज क्लब रिपोर्टर
मुंबईतील कॉलेज कॅम्पसमध्ये सध्या माहोल आहे तो फेस्टिवलचा. फेस्टचं धुमशान अनुभवायला सर्वच कॉलेज विद्यार्थी सज्ज आहेत. अशा सगळ्या फेस्टिवलच्या वातावरणात माटुंग्याचं पोदार कॉलेजही 'मॉनेटा' हा फेस्ट घेऊन हजर झालंय. 'मॉनेटा' हा फेस्टिवल यावर्षी ८ ते ११ डिसेंबर या दरम्यान कॉलेज कॅम्पसमध्ये रंगणार आहे. स्टार्ट अपच्या युगात कर भरण्यापासून ते शेअर बाजारचे फंडे जाणून घेण्यात सर्वांना रस आहे. त्यामुळे 'मॉनेटा २०१६: स्टार्ट अप शोडाउन' ही यावर्षीची थीम सर्वांचंच लक्ष वेधून घेणारी आहे. 'महाराष्ट्र टाइम्स' या फेस्टिवलचा मीडिया पार्टनर आहे.
'मॉनेटा' या फेस्टमध्ये विविध स्पर्धांमधून तुमचं वित्तीय ज्ञान तपासलं जाणार आहे. दरवर्षीप्रमाणे विद्यार्थ्यांच्या आवडत्या 'बुलरिंग' या स्पर्धेमध्ये एका मॉक स्टॉक एक्स्चेंजचं आयोजन केलं जाईल. जिकडे स्पर्धक शेअर्सची उलाढाल करताना दिसतील. याबरोबरच सेमिनार्सद्वारे अनुभवी लोकांकडून मार्गदर्शन मिळेल आणि विद्यार्थ्यांना विविध कार्यशाळांमधून नवीन गोष्टी शिकण्याची संधी मिळणार आहे.
'मॉनेटा'च्या सामाजिक उपक्रम 'लर्न इंडिया'द्वारे आर्थिक साक्षरता निर्माण करण्यासाठी टीम मॉनेटाने विविध शाळांना भेट देऊन आर्थिक विषयांची माहिती दिली. यासाठीच ४ डिसेंबरला 'रन फॉर फायनांशियल लिट्रसी'चं आयोजन करण्यात आलं होतं. फेस्टिवलविषयी अधिक माहिती जाणून घेण्यासाठी ८७६७७३२२४२ या क्रमांकावर संपर्क साधावा. फेस्टिवलच्या अनेक स्पर्धांची माहिती जाणून घेण्यासाठी http://moneta2016.wixsite.com/startupshowdown या वेबसाइटला भेट द्यावी.