कचरा उचलणार रोबो

अजय उभारे, कॉलेज क्लब रिपोर्टर

रोजच्यारोज रस्त्यावरचा कचरा गोळा करून शहरांमध्ये स्वच्छता राखणं हे काम सोपं नाही. पण, कचरा गोळा करण्याच्या कामासाठी रोबोच मदतीला आला तर? विवा कॉलेजच्या विद्यार्थ्यांनी असा रोबो बनवला असून, ‘ट्रान्सफॉर्मिंग महाराष्ट्र’मध्ये त्याला दुसऱ्या क्रमांकानं गौरवण्यात आलं. त्याविषयी…

वाढत्या लोकसंख्येमुळे दिवसेंदिवस कचऱ्याची समस्या उग्र रुप धारण करू लागली आहे. एवढा प्रचंड कचरा गोळा करणं, डम्पिंग ग्राऊंडचा प्रश्न यामुळे शहरांचा कारभार चालवणाऱ्या महापालिकांसमोर आव्हान उभं ठाकलं आहे. याचाच विचार करून विरारच्या विवा इन्स्टिट्यूट ऑफ टेक्नॉलॉजीच्या या विद्यार्थ्यांनी एक कचरा वेचणारा रोबो तयार केला आहे. चिन्मय संखे, यश पाटील, चुनौती वर्तक, स्वराली सारंगधर आणि अनुकूल सावे अशी या विद्यार्थ्यांची नावं आहेत. 'इंटलिजंट गार्बेज कलेक्टर अँड क्लासिफायिंग रोबो' असं नाव या रोबोला देण्यात आलं आहे.

मुख्यमंत्री देवेंद्र फडणवीस यांच्या संकल्पनेतून साकारलेल्या ट्रान्सफॉर्मिंग महाराष्ट्र या कार्यक्रमात विवाच्या या विद्यार्थ्यांना स्वच्छ महाराष्ट्र ग्रुप अंतर्गत पब्लिक चॉईस अॅवॉर्डमध्ये दुसऱ्या क्रमांकानं गौरवण्यात आलं.

कसं काम करतो?
रस्त्यावरुन चालताना रोबोच्या मार्गात येणाऱ्या गोष्टी तो सेन्सरच्या मदतीने ओळखतो. त्यातून तो कचरा आहे का याचा अंदाज तो घेतो. त्यानंतर समोर कचरा असल्यास त्याची सुका किंवा ओला कचरा अशी वर्गवारी करून तो कचरा वेगळा केला जातो. सध्या प्राथमिक पातळीवर असलेला हा रोबो तयार करण्यासाठी सुमारे चौदा हजार रुपये खर्च आल्याचं गटप्रमुख चिन्मयनं सांगितलं. भविष्यात या मॉडेलनुसार मोठा रोबो तयार करायच्या झाल्यास त्याच्या वापरानुसार हा खर्च वाढू शकतो.

जीपीएस बसवणं शक्य
वाढत्या कचऱ्याची समस्या ही प्रत्येक महापालिका, नगरपालिकेसाठी डोकेदुखी ठरत आहे. कचऱ्याची विल्हेवाट लावण्याच्या अयोग्य पद्धतींमुळे पर्यावरणालाही हानी पोहोचते. कचऱ्यात असलेल्या अनेक घटकांपैकी बऱ्याच गोष्टी पुन्हा वापरात आणणं शक्य असतं. अनेक ठिकाणी सुका आणि ओला कचरा वेगळा ठेवण्याच्या सूचना देऊनही लोक त्याकडे दुर्लक्ष करतात. विद्यार्थ्यांनी तयार केलेला हा रोबो सेन्सरच्या मदतीनं कचरा वेगळा करतो. जीपीएस प्रणाली जोडून या रोबोचं लोकेशन शोधणं सहज शक्य आहे. घरातला आणि रस्त्यावरचा कचरा उचलण्याबरोबरच नदीच्या पात्रातला कचरा उचलण्याचं कामही हा रोबो करू शकतो. पालिकेच्या कचरागाडीवर ही यंत्रणा बसवून शहरांत स्वच्छता राखण्याचं काम सोपं होईल असं या विद्यार्थ्यांनी सांगितलं.