गोष्ट तशी प्रेमाचीच

विपुला घोसाळकर, कॉलेज क्लब रिपोर्टर

माटुंग्याच्या रुईया कॉलेजमधल्या ‘रोझ डे’बाबत कॉलेजिअन्सना उत्सुकता लागून राहिलीय. पण, कुठल्याही कॉलेजात साजऱ्या होणाऱ्या रोझ डेसारखा, टिपिकल पद्धतीने इथे हा दिवस साजरा होत नाही. या खास दिवसातून काही विशिष्ट संदेश देण्याचा प्रयत्न कॉलेजचे विद्यार्थी करतात.

कॉलेजच्या डेजमध्ये सगळ्यात जास्त चर्चा असते ‘रोझ डे’ची. माटुंग्याच्या रुईया कॉलेजमधल्या ‘रोझ डे’बाबतही कॉलेजिअन्सना उत्सुकता लागून राहिलीय. पण, कुठल्याही कॉलेजात साजऱ्या होणाऱ्या रोझ डेसारखा, टिपिकल पद्धतीने इथे हा दिवस साजरा होत नाही. या खास दिवसातून काही विशिष्ट संदेश देण्याचा प्रयत्न कॉलेजचे विद्यार्थी करतात. यंदाही कॉलेजचं विद्यार्थी प्रतिनिधी मंडळ आणि ‘रेसक्विंक असोसिएशन फॉर वाइल्डलाइफ वेल्फेअर’ (RAWW) यांच्यातर्फे हा खास दिवस येत्या २४ सप्टेंबरला कॉलेजमध्ये साजरा होणार आहे. ‘वन लव्ह - लव्ह टू ऑल अँड फॉर ऑल’ अशी थीम यासाठी घेण्यात आली असून, या दिवशी होणाऱ्या खास कार्यक्रमाचा ‘महाराष्ट्र टाइम्स’ मीडिया पार्टनर आहे. प्रेमात दुसऱ्याच्या भावनांना जसं फुलासारखं जपलं जातं, तसंच सध्या हरवत चाललेल्या वन्यजीवनाला त्याच भावनेनं जपणं कसं आवश्यक आहे हे विद्यार्थ्यांच्या मनावर बिंबवलं जाणार आहे.

गेल्या वर्षी 'इन्क्लुसिव्हनेस इन लव्ह’, अर्थात ‘कोणत्याही प्रकाराचा भेदभाव न करता सर्वांशी मिळूनमिसळून राहण्यातही प्रेम असतं’ हा संदेश देण्यात आला होता. तसंच यंदाही 'वन-लव्ह’ अशी थीम घेण्यात आली आहे. या थीमचं वैशिष्ट्य म्हणजे, जंगलं, त्यात राहणारे पशू-पक्षी, वृक्ष-वेली या सर्वांवर प्रेम करा, असं यातून सांगितलं जाणार आहे. सध्याच्या काळात विकासाच्या नावाखाली पर्यावरणाला मोठ्या प्रमाणावर हानी पोहोचवली जातेय. त्याचे दुष्परिणाम आपल्याला दिसू लागले असून, वन्य जीवनाची जपणूक करणं आवश्यक झालं आहे. याचं भान जपण्याचा प्रयत्न यातून केला जाणार आहे. त्याचबरोबर ‘रोझ किंग’ आणि ‘रोझ क्वीन’ ही स्पर्धासुद्धा रंगणार आहेच. ‘कॉलेजिअन्सच्या मनात वन्य जीवनाविषयी जागरुकता निर्माण करण्याचा आमचा हा प्रयत्न आहे’ असं व्हीपीएम हेड मनीष हाटे याने यावेळी सांगितलं.