थोडा ब्लॅक, थोडा व्हाइट

>> सिमरन नवले, कॉलेज क्लब रिपोर्टर

धमाल, मस्ती, म्युझिक अन् गप्पांसोबत जोडीला शॉर्टफिल्म्सची रेलचेल. असा होता यंदाचा रुईया कॉलेजचा 'टिल्ट शिफ्ट शॉर्टफिल्म' महोत्सव. मास मीडिया विभागाचा टिल्ट शिफ्ट महोत्सव नुकताच कॉलेज कॅम्पसमध्ये मोठ्या दिमाखात पार पडला. या फेस्टिव्हलची 'ब्लॅक अँड व्हाइट' अशी थीम होती तर या फेस्टिव्हलचा 'महाराष्ट्र टाइम्स' मीडिया पार्टनर होता.

'ब्लॅक अँड व्हाइट' असं म्हटल्यानंतर मनातील पूर्वग्रह दूषित कल्पनांना छेद देऊन अनेक तरुण चित्रपट निर्मात्यांनी आपल्या फिल्म्स तयार केल्या. त्याला परीक्षकांनीही दाद दिली. पारंपरिक स्पर्धांपेक्षा थोडंसं हटके असं आयोजन 'टिल्ट शिफ्ट' टीमच्या वतीने करण्यात आलं. रूईयाच्या टीम मिररने प्रथम पारितोषिक मिळवलं.

या स्पर्धेला परीक्षक म्हणून कान्स आणि लंडन चित्रपट महोत्सवाचे ज्युरी डॉ. ड्रागन मिलिंकोव्हिक, दिग्दर्शिका मनिषा कोरडे, अभिनेता रोहित सराफ लाभले. चित्रपटाची निर्मिती करताना कुठला दृष्टिकोन ठेवावा, तांत्रिक बाबींचा विचार कसा करावा याचं मार्गदर्शन मान्यवरांनी केलं. सामाजिक भान म्हणून ‘मेन अगेन्स्ट व्हायलेन्स अँड अब्युज’ संस्थेचा ‘समभाव’ हा दोन दिवसांचा चित्रपट महोत्सवही कालावधीत पार पडला.