ताल 'ऱ्हिदम'चे

मयूर परदेशी, कॉलेज क्लब रिपोर्टर
बॉलिवूड आणि पाश्चिमात्य संगीतावर थिरकत, अनेक नवीन इव्हेंट्सचा मनसोक्त आनंद लुटत अथर्व कॉलेज ऑफ इंजिनीअरिंगच्या विद्यार्थ्यांच्या 'ऱ्हिदम' या सांस्कृतिक फेस्टिव्हलची तरुणांनी मनसोक्त मजा लुटली. 'महाराष्ट्र टाइम्स' या फेस्टचा मीडिया पार्टनर होता. 'रूपांतर-इन्ट्रोड्युसिंग द इंडिया २.०' अशी या फेस्टची अनोखी थीम होती. त्यामुळे फेस्टमध्ये आपला देश कसा प्रगती करतोय, पाश्चिमात्त्य संस्कृतीला आत्मसात करतानाही भारतीय, पारंपरिक संस्कृतीला कशी चिटकून आहे या सगळ्याचं चित्रीकरण सेंटर मॉडेलमधून झालं.
'ऱ्हिदम'ची सुरुवात ६ किमीच्या मॅरेथॉनपासून झाली. तसंच आपल्या देशाच्या प्रगतीला आपण कसं मोलाचं योगदान देऊ शकतो हे दुसऱ्या दिवशी झालेल्या एकांकिका आणि पथनाट्याद्वारे सुरेखरीत्या दर्शवलं. फॅशनेबल राहण्याच्या, सुंदर दिसण्याच्या काही साचेबद्ध कल्पना प्रचलित आहेत. अशा संकल्पनांना छेद देत अगदी भारतीय पेहरावांची स्टाइल फॅशन रॅम्पवर झळकली. 'ब्रम्हा, विष्णू, महेश' ही थीम असलेल्या अथर्व कॉलेजच्या विद्यार्थ्यांनी ही स्पर्धा जिंकली.
सगळ्या कॉलेजच्या विद्यार्थ्यांचा आवडता इव्हेंट म्हणजे ग्रुप डान्स स्पर्धा. ग्रुप डान्समध्ये अनेक मराठी आणि पाश्चिमात्य मेळ असलेल्या संगीतावर शिट्यांच्या नादात विद्यार्थ्यांनी उत्कृष्ट सादरीकरण केलं. अथर्व कॉलेजच्या डान्स ग्रुपने ही स्पर्धा जिंकली.