संघवीमध्ये रंगणार ‘ट्रिनिटी’ शो

अजय उभारे, कॉलेज क्लब रिपोर्टर

भावी इंजिनीअर्समधल्या वेगळ्या कलागुणांना वाव देणारे काही फेस्टिव्हल्सही इंजिनीअरिंग कॉलेजांमध्ये आयोजित केले जातात. विलेपार्लेच्या ‘द्वारकादास संघवी अभियांत्रिकी कॉलेज’चा ‘ट्रिनिटी’ फेस्टिव्हल हे त्यातलंच एक उदाहरण.

इंजिनीअरिंग कॉलेज आणि तंत्रज्ञानाचा आविष्कार दाखवणारे विविध टेक्निकल फेस्ट हे जणू एक समीकरणच आहे. परंतु केवळ तेवढंच नव्हे तर भावी इंजिनीअर्समधल्या वेगळ्या कलागुणांना वाव देणारे काही फेस्टिव्हल्सही इंजिनीअरिंग कॉलेजांमध्ये आयोजित केले जातात. विलेपार्लेच्या ‘द्वारकादास संघवी अभियांत्रिकी कॉलेज’चा ‘ट्रिनिटी’ फेस्टिव्हल हे त्यातलंच एक उदाहरण. येत्या २३ ते २५ मार्च या दरम्यान कॉलेजमध्ये होणाऱ्या या फेस्टचा ‘महाराष्ट्र टाइम्स’ मीडिया पार्टनर आहे.

सांस्कृतिक उपक्रम, टेक्निकल इव्हेंट आणि भरपूर मजा-मस्ती घेऊन येणारे फन इव्हेंट्स असा त्रिवेणी संगम असल्यामुळे या फेस्टला ‘ट्रिनीटी’ हे नाव देण्यात आल्याचं हे विद्यार्थी सांगतात. टेक्निकल कॉलेज म्हटलं की, टेक्निकल इव्हेंट्स आणि त्यावर आधारित विविध स्पर्धाही येतात. यंदाच्या ट्रिनीटीमध्ये रोबोवॉर, टेक-एक्स्पो, आयसी इंजिन, पेपरप्रेझेन्टेशन यासारखे टेक्निकल इव्हेंट आहेत. तर ट्रिनीटीची खासीयत असणारा ‘डीजेस गॉट टॅलेंट’ ही स्पर्धाही या वर्षी आयोजित करण्यात आली आहे.

विद्यार्थ्यांना त्यांच्यातल्या वेगवेगळ्या कलागुणांना वाव देण्याची उत्तम संधी स्पर्धेच्या निमित्ताने मिळणार आहे. खाण्याची आणि खाऊ घालण्याची आवड असणाऱ्यांसाठी ‘मास्टरशेफ’ ही स्पर्धा होणार आहे. स्वतः खाण्याची आणि नवनवीन पदार्थ बनवून इतरांना खाऊ घालण्याची हौस असणाऱ्यांना या स्पर्धेत सहभागी होता येईल. त्यात त्यांच्या पाककौशल्याचा कस लागणार आहे. नवख्या शेफ्सनाही ‘मास्टरशेफ’ बनण्याची संधी यात मिळेल.

टेक्निकल आणि फन इव्हेंट्ससोबतच फेस्टिव्हलच्या दुसऱ्या दिवशी, म्हणजेच २४ मार्चला एका संगीतसंध्येचं आयोजनही टीम ट्रिनिटीनं केलं आहे. ‘लाइव्ह इन कॉन्सर्ट’च्या या भन्नाट कार्यक्रमात गायिका सुनिधी चौहानला लाइव्ह ऐकण्याची आणि तिच्यासोबत तिच्या विविध गाण्यांच्या तालावर थिरकण्याची संधी म्हणजे उपस्थितांसाठी पर्वणीच ठरणार आहे.