संदेश राठोड, सेंट जॉन कॉलेज ऑफ इंजिनीअरिंग
पालघरमधील सेंट जॉन कॉलेजचे विद्यार्थी गेले काही दिवस स्वच्छ भारत मोहिमेअंतर्गत श्रमदान करत होते. 'स्वच्छ भारत समर इंटर्नशीप' या अभियानात या विद्यार्थ्यांनी त्यांचा सहभाग नोंदविला. पालघर तालुक्यातील नवपाडा येथील शेलवली गावातील आदिवासी रहिवासांच्या समस्या जाणून घेऊन तिथे हे शिबीर राबवण्यात आले होते. शाळेत जाणाऱ्या आदिवासी विद्यार्थ्यांसाठी वॉश बेसिन स्टेशन तयार करण्याचे ठरवण्यात आले, जेणेकरून स्वच्छता पाळली जाईल आणि अनेक आजारांपासून दूर राहण्यास मदत होईल. कॉलेजच्या राष्ट्रीय सेवा योजना विभागाच्या स्वयंसेवकांनी वॉश बेसिन बांधण्याचे काम सुरू केले. कुठल्याही प्रकारचे प्रायोजकत्व न घेता तेथील रहिवाशांची मदत घेऊन माती, विटा जमा करून शाळेत वॉश बेसिन स्टेशन तयार केले. त्याचप्रमाणे शाळेला जलसाठ्यासाठी पाण्याची टाकी देण्यात आली. विद्यार्थ्यांच्या स्वच्छतेचा व त्यांच्या आरोग्याचा विचार करून हे श्रमदान यशस्वीरीत्या पार पडले. शाळेतील शिक्षक, स्थानिक ग्रामस्थ, गाव अधिकारी आणि सरपंच यांनीही सहकार्य केले होते. सेंट जॉन कॉलेजचे प्राध्यापक डॉ. जी. वी. मुलगुंद यांच्या हस्ते या वॉश बेसिन स्टेशनचे उद्घाटन होणार होते, परंतु त्यांनी हा मान विद्यार्थ्यांना दिला आणि रॉजर डीसिल्वा या विद्यार्थ्यांच्या हस्ते उद्घाटन करण्यात आले. ग्रामस्थांनी आपल्या स्वच्छतेची काळजी घेत रोगांपासून आपला बचाव कसा करावा, याबद्दल विद्यार्थ्यांनी मार्गदर्शन केले. शिबीर यशस्वी करण्यासाठी एनएसएस कार्यक्रम अधिकारी सचिन उराडे यांनी मेहनत घेतली.