विल्सनमध्ये पोलारिस फेस्टची धूम
००००
प्रथमेश गायकवाड, विल्सन कॉलेज
संपूर्ण शहरात मान्सूनचे वारे वाहत असताना विल्सन कॉलेजमध्ये पोलारिस फेस्टिव्हलचे वारे वाहत आहेत. वर्षातील पहिला बीएमएम फेस्ट अशी ओळख असलेला पोलारिस येत्या ९ ते १० ऑगस्ट दरम्यान विल्सन कॉलेजमध्ये साजरा होत आहे. 'अन्वेषणा' अशी यंदाची थीम असून 'महाराष्ट्र टाइम्स' या फेस्टचा मीडिया पार्टनर आहे.
धमाल, मजा आणि मस्ती याबरोबरच विद्यार्थ्यांच्या कलागुणांना वाव देणाऱ्या या फेस्टमध्ये प्रीइव्हेंट आणि स्पोर्ट्स डे एकाच दिवशी होणार आहेत. स्पोर्ट्स डेच्या दिवशी फुटबॉल आणि खो-खो हे खेळ खेळले जाणार आहे. तसंच आसाम येथे आलेल्या पुरासंबंधी जनजागृती निर्माण करण्यासाठी इव्हेंट्स ठेवले जाणार आहेत. त्याचबरोबर पोलारिसच्या मुख्य आणि भव्य अशा पोस्टरचंही अनावरण केलं जाणार आहे.
विद्यार्थ्यांमधील सुप्त कलागुणांचा विकास व्हावा यासाठी अनेक आकर्षक आणि हट के इव्हेंट्स ठेवण्यात आले आहेत. नाटक, स्क्रीनप्ले रायटिंग, शॉर्ट फिल्म, फेस पेंटिंग, कोलाज, फॅशन शो, डान्सिंग, फोटोग्राफी, बँड, अशा स्पर्धा घेण्यात येणार आहेत. तर यंदा स्टँड अप कॉमेडी आणि डिजिटल डिझाइन यासारखे हट के इव्हेंटसुद्धा घेण्यात येणार आहेत. त्याचबरोबर यंदा पोलारिसमध्ये येणाऱ्या 'एम एच फोर्टी थ्री' बँडचीही विद्यार्थ्यांमध्ये चर्चा आहे. एकूणच मनोरंजन, कला, मजा, मस्ती यांची मेजवानी असलेला हा फेस्ट विद्यार्थी गाजवणार यात काही शंकाच नाही.
००००
आसाममधील पूरग्रस्तांना मदतीचा हात
पोलारिस फेस्टिव्हलच्या प्रीइव्हेंटचा एक भाग म्हणून स्पर्धकांना आसाममधील पूरग्रस्तांना मदत करण्यासाठी आवाहन करण्यात आलं होतं. त्यामध्ये पोलारिस टीमला खूप चांगला प्रतिसाद मिळाला असून तांदूळ, पोहे, सोयाबीन, गहू, साखर, हे प्रत्येकी ५० किलो आणि मच्छरदाणी, बिस्कीट, पाण्याच्या बाटल्या, मेणबत्त्या, दुधाचे पाऊच, इत्यादी जीवनावश्यक वस्तू पुरवण्यात आल्या.