‘सिनर्जी’ देणार एनर्जी

प्रियांका गवळी, एचआर कॉलेज

कॉलेजिअन्सना अनोखी एनर्जी देणारा, पार्ल्यातल्या साठ्ये कॉलेजचा ‘सिनर्जी’ हा फेस्टिव्हल बुधवारपासून, म्हणजेच येत्या १३ डिसेंबरपासून कॉलेजमध्ये साजरा होणार आहे. ७० हून अधिक कॉलेजांचा सहभाग, १२०० हून अधिक विद्यार्थी सहभागी होत असलेल्या या फेस्टिव्हलची जोरदार तयारी सध्या कॅम्पसमध्ये सुरू आहे.

कॉलेजिअन्सना अनोखी एनर्जी देणारा, पार्ल्यातल्या साठ्ये कॉलेजचा ‘सिनर्जी’ हा फेस्टिव्हल बुधवारपासून, म्हणजेच येत्या १३ डिसेंबरपासून कॉलेजमध्ये साजरा होणार आहे. ७० हून अधिक कॉलेजांचा सहभाग, १२०० हून अधिक विद्यार्थी सहभागी होत असलेल्या या फेस्टिव्हलची जोरदार तयारी सध्या कॅम्पसमध्ये सुरू आहे. या फेस्टमध्ये ४० पेक्षा जास्त स्पर्धा घेतल्या जाणार असून, कला, क्रीडा, साहित्य आणि त्याचबरोबर व्यवस्थापन अशा चार क्षेत्रांशी संबंधित विद्यार्थ्यांचं कौशल्य यात पणाला लागणार आहे. १३ ते १६ डिसेंबरदरम्यान साजऱ्या होणाऱ्या या फेस्टचा ‘महाराष्ट्र टाइम्स’ मीडिया पार्टनर आहे.

कॉलेजच्या बीएमएस विभागाचा हा फेस्टिव्हल आहे. फेस्टिव्हलमध्ये होणारी ‘बीट बॉक्सिंग’ ही स्पर्धा विद्यार्थ्यांसाठी विशेष आकर्षण असेल. फेस्टिव्हलच्या पहिल्या दिवशी सर्व क्रीडा स्पर्धा रंगणार आहेत. त्यामध्ये मैदानी खेळांसोबतच इनडोअर खेळांचा देखील समावेश असणार आहे. बॉक्स क्रिकेट, कॅरम, व्हॉलिबॉल ,आर्मरेसलिंग, कबड्डी या खेळांचे सामने यावेळी खेळवले जातील.

फेस्टिव्हलच्या दुसऱ्या दिवशी प्रायोगिक कलांवर आधारित स्पर्धा रंगणार आहेत. स्पर्धकांचा हजरजबाबीपणा, बौद्धिक क्षमता आणि व्यक्तिमत्त्व तपासणारी, ३ वेगवेगळे राऊंड्स असलेली 'पर्सनॅलिटी पीजेन्ट' ही मजेशीर स्पर्धा देखील याच दिवशी रंगेल. फेस्टिव्हलमध्ये अनोखे रंग भरणाऱ्या इंडो-फ्युजन बँड, डान्स मॅनिया, विविध सामाजिक प्रश्नांवर भाष्य करणारी स्ट्रीटप्ले स्पर्धा, बीटबॉक्सिंग अशा एकूण ११ वेगवेगळ्या स्पर्धांचा समावेश दुसऱ्या दिवशीच्या कार्यक्रमांमध्ये असेल.

फेस्टिव्हलच्या तिसऱ्या दिवशी, म्हणजे १५ डिसेंबरला साहित्य, कला आणि व्यवस्थापन यावर आधारित स्पर्धा रंगतील. कोणत्याही क्षेत्रात काम करताना व्यवस्थापन कौशल्य असणं हे महत्वाचं आहे. म्हणूनच ‘सिनर्जी’मध्ये व्यवस्थापन कौशल्याला वाव देणाऱ्या स्पर्धांवर भर दिला जाणार आहे. वादविवाद, काव्यलेखन, डूडलर नावाची कार्टून काढण्याची स्पर्धा अशा एकूण ७ स्पर्धा यात होतील. त्याचबरोबर न्यूज हंटर, आईसक्रीम स्टिक मॉडेलिंग, कॉर्पोरेट रोडीज या व्यवस्थापन कलेवर आधारित ७ स्पर्धा रंगणार आहेत.

चौथ्या आणि शेवटच्या दिवशी ‘थे अमेझिंग रेस’ असं नाव असलेली, धावण्याची स्पर्धा कॅम्पसमध्ये होईल. फोटोग्राफी, मिनिट टू विन, कॉमेडी हंट, क्विझर्ड्स या स्पर्धांनी ‘सिनर्जी’चा रंगतदार समारोप होईल.