टेक…सेट…गो!

आकाश कदम, दत्ता मेघे कॉलेज

तरुणाईचा सळसळता उत्साह, एकापेक्षा एक भन्नाट टेक्निकल इव्हेंट्स, जिंकण्यासाठी प्रयत्न करणारे स्पर्धक आणि याबरोबरच जपलेलं सामाजिक भान या सगळ्यांचा अनोखा मिलाफ दत्ता मेघे कॉलेजच्या ‘टेक्निट्यूड २०१७’ फेस्टिव्हलमध्ये पाहायला मिळतोय.

तरुणाईचा सळसळता उत्साह, आयोजकांची सुरू असलेली धावपळ, पोस्टरवर कलाकारी दाखवणारे हात, एकापेक्षा एक भन्नाट टेक्निकल इव्हेंट्स, जिंकण्यासाठी प्रयत्न करणारे स्पर्धक आणि याबरोबरच जपलेलं सामाजिक भान या सगळ्यांचा अनोखा मिलाफ दत्ता मेघे कॉलेजच्या ‘टेक्निट्यूड २०१७’ फेस्टिव्हलमध्ये पाहायला मिळतोय. हा फेस्ट १५ आणि १६ सप्टेंबर या दोन दिवसांत रंगणार असून, या टेक्निकल फेस्टचा ‘महाराष्ट्र टाइम्स’ मीडिया पार्टनर आहे.

मनोरंजनपेक्षाही तंत्रज्ञानावर आधारित इव्हेंट्सची यात रेलचेल असेल. या फेस्टमध्ये प्रत्येक विभाग वेगवेगळे इव्हेंट्स आयोजित करत असतात. तंत्रज्ञानावर आधारित असलेल्या या इव्हेंट्समध्ये सर्किट डिझायनिंग, कोडवॉर, ऑटोकॅड यासारख्या टेक्निकल इव्हेंट्सवर भर देण्यात आला आहे. यामध्ये 'नाईट आऊट'सारखा इव्हेंट ठेवण्यात आला असून, त्यात १५ तारखेला रात्री १२ वाजता स्पर्धकांना काही टास्कची यादी मिळणार आहे. ज्यामध्ये फेस पेंटिंगचा फोटो, बॉटल फ्लिपिंगचा व्हिडिओ असे टास्क पूर्ण करायचे आहेत. जो ते लवकर पाठवेल तो विजेता होऊ शकेल.

सिव्हील इंजिनीअरिंगची एसेस कमिटी यावर्षी विविध टेक्निकल स्पर्धांचं आयोजन करणार आहे. यामध्ये ब्रिज-ईट, ऑटो कॅड, स्टॅड प्रो या स्पर्धांचा समावेश आहे. ब्रिज-ईट या खेळात दिलेल्या मर्यादित साहित्यात आणि वेळेत एका पूलाची प्रतिकृती तयार करायची असते. ज्या स्पर्धकाचा पूल सर्वाधिक वजन उचलेल तो विजयी ठरेल. तसेच दुसरे इव्हेंट्स म्हणजे ऑटोकॅड व स्टॅड प्रो. रोजच्या वापरातले सॉफ्टवेअर वापरून डिझाइन तयार करायची स्पर्धा घेतली जाते. फेस्टिव्हलमध्ये तंत्रज्ञानाबरोबर मनोरंजनाचा अनुभव बेग-बॉरो-स्टील, ब्लॅकआउट, ट्रेझर हंट, पिक्सओमीनिया, पिझोग्राफी, टास्क मेनिया यामधून मिळणार आहे.

जास्तीत जास्त स्पर्धकांना इव्हेंट्सचा आनंद घेता यावा यासाठी काही इव्हेंट्सची आखणी अशी केली आहे जेणेकरून एकच स्पर्धक विविध इव्हेंट्समध्ये सहभागी होऊ शकेल. हा संपूर्ण फेस्टिव्हल प्रिन्सिपल डॉ. एस. डी. सावरकर आणि डीन डॉ.एस.आर.देवाने यांच्या मार्गदर्शनाखाली आयोजित करण्यात येत आहे.