गायत्री गुरव, के. सी. कॉलेज
टेकवेड्यांसाठी आणि इंजिनीअरिंगचं शिक्षण घेण्याऱ्यांसाठी खास आकर्षण असणारं के. जे. सोमय्या कॉलेजचा 'रेनेसान्स २०१९' हा फेस्ट नुकताच पार पडला. यंदा 'इन्फायनाइट कॉसमॉस' ही या फेस्टची थीम होती. ही थीम इस्रोच्या नुकत्याच झालेल्या 'चांद्रयान-२' मोहिमेवरुन ठरवण्यात आली होती. 'महाराष्ट्र टाइम्स' या फेस्टिव्हलचा मीडिया पार्टनर होता.
फेस्टमध्ये जवळजवळ ७० पेक्षा अधिक इव्हेंट्स आणि उपक्रम टेकप्रेमींसाठी आयोजित करण्यात आले होते. फेस्टच्या माध्यमातून विद्यार्थ्यांना बऱ्याच नवनवीन तांत्रिक अविष्कारांविषयी माहिती मिळाली. ४५०हून अधिक विद्यार्थ्यांच्या तांत्रिक कौशल्यांचा आणि विचारांचा कस या इव्हेंट्स, गेम्स आणि इतर उपक्रम राबवण्यात लागला होता. यंदाच्या रेनेसान्समध्ये 'कोड इन एक्स', 'कोड क्रॅकर' आणि 'टेक्निकल क्विज'ला विद्यार्थ्यांचा प्रचंड प्रतिसाद लाभला. तसंच कम्प्युटर गेमिंग, टेक्निकल ट्रेझर हंट, रोबो सॉकर आणि रोबो गोल्फ यांसारख्या अनेक इव्हेंट्ससाठी आणि गेम्ससाठी विद्यार्थ्यांनी मोठ्या संख्येनं हजेरी लावली. विद्यार्थ्यांना तंत्रज्ञानाबद्दल मनोरंजक पद्धतीनं माहिती पोहोचवणं हा या फेस्टिव्हलचा मुख्य हेतू होता.
निरनिराळे तांत्रिक कलाविष्कार, इव्हेंट्स आणि उपक्रम पाहण्यासाठी आणि त्यात सहभागी होण्यासाठी तीन हजाराहून जास्त विद्यार्थ्यांनी उपस्थिती नोंदवली होती. विद्यार्थ्यांचा सर्वांगीण विकास व्हावा म्हणून कॉलेजमध्ये हा फेस्टिव्हल दरवर्षी मोठ्या उत्साहात साजरा होतो.