माहितीपुस्तिकेची प्रतीक्षा संपणार

अकरावी ऑनलाइन प्रवेश प्रक्रिया; लवकरच घोषणा

sourabh.sharma1 @timesgroup.com
Tweet : @sourabhsMT

मुंबई : अकरावी ऑनलाइन प्रवेशासाठी महत्त्वाच्या मानल्या जाणाऱ्या माहितीपुस्तिकेची प्रतीक्षा लवकरच संपणार आहे. येत्या तीन-चार दिवसांत या माहितीपुस्तिकेच्या वाटपाची घोषणा करण्यात येणार आहे. त्याबाबतची अंतिम घोषणा शिक्षण उपसंचालक विभागाकडून लवकरच करण्यात येणार असून ही माहितीपुस्तिका लवकरच विद्यार्थ्यांना त्यांच्या शाळेत उपलब्ध होणार आहोत. मुंबई शिक्षण उपसंचालक कार्यालयाने या वृत्ताला दुजोरा दिला असून लवकरच विद्यार्थ्यांची प्रतीक्षा संपणार असून प्रवेशाची परीक्षा सुरू होणार आहे.

मुंबई उच्च न्यायालयाच्या आदेशानुसार यंदापासून अकरावी प्रवेशासाठी नव्याने प्रवेश प्रक्रिया राबविण्यात येत आहे. त्यानुसार या प्रवेशाची संपूर्ण जबाबदारी ही नोएडाच्या नाएसा या कंपनीकडे देण्यात आली आहे. या कंपनीकडे यंदाही ही वेबसाइट पूर्णपणे नव्याने आखण्यात येत असून त्याचे काम अंतिम टप्प्यात आले आहे. या प्रवेशाची संपूर्ण माहिती आणि कॉलेजांच्या कट-ऑफसह इतर माहिती असलेल्या माहिती पुस्तकांची छपाई जवळपास पूर्ण झाली आहे. अकरावी प्रवेशासाठी ही पुस्तिका महत्त्वाची मानली जात असून या पुस्तिकेमध्येच विद्यार्थ्यांना त्यांचे यूजर आयडी आणि पासवर्ड दिला जातो. दरवर्षी हे पुस्तक मेच्या सुरुवातीला मिळते. यंदा मात्र हे पुस्तक अद्याप प्राप्त न झाल्याने विद्यार्थी व पालकांच्या चितेंत वाढ झाली होती. विद्यार्थी आणि पालकांची चिंता आता लवकरच संपणार आहे.

अकरावी ऑनलाइन प्रवेशासाठी विद्यार्थ्यांना देण्यात येणारी माहितीपुस्तिका कशाप्रकारे देता येइल आणि या संदर्भातील वेळापत्रक लवकरच जाहीर केले जाईल, असे शिक्षण उपसंचालक बी. बी. चव्हाण यांनी ‘मटा’शी बोलताना जाहीर केले. दोन ते तीन दिवसांत ही पुस्तिका विद्यार्थ्यांना देण्यात येणार असून मे अखेरीस प्रवेशाचे वेळापत्रक जाहीर करण्याचे शिक्षण उपसंचालक विभागाचा मानस असल्याचे त्यांनी सांगितले.

शाळेतच मिळणार पुस्तक

दरवर्षी अकरावी प्रवेशासाठीची माहितीपुस्तिका विद्यार्थ्यांना शाळेतच देण्यात येते. त्यात कोणत्याही प्रकारचा बदल झालेला नसल्याचे शिक्षण उपसंचालक चव्हाण यांनी जाहीर केले. या संदर्भात अफवांवर विश्वास न ठेवता शिक्षण उपसंचालक विभाग योग्य तेव्हा वेळापत्रक जाहीर करेल, त्यानुसारच प्रवेश प्रक्रिया होणार असल्याची माहिती त्यांनी यावेळी दिली.