मुलुंडमध्ये लवकरच रंगणाऱ्या नाट्यसंमेलनावर नाट्यक्षेत्रातल्या जुन्या-नव्या रंगकर्मींबरोबरच कॉलेजिअन्सचीही छाप असणार आहे. संमेलनाच्या सजावटीची धुरा डहाणूकरच्या विद्यार्थ्यांच्या खांद्यावर असून, पूर्वरंगातील कार्यक्रमांमध्येही रुईया, डहाणूकर, व्हीजेटीआय, केळकरच्या विद्यार्थ्यांचा सहभाग आहे.
कल्पेशराज कुबल, साठ्ये कॉलेज
मुंबईत १३ ते १५ जूनदरम्यान रंगणाऱ्या ९८ व्या अखिल भारतीय मराठी साहित्य संमेलनामध्ये तरुणाईचा सळसळता उत्साह देखील पाहायला मिळणार आहे. कॉलेजांमधली तरुणाई संमेलनामध्ये उत्साहानं सहभागी होणार असून, डहाणूकर कॉलेजच्या तरुण नाट्यप्रेमींवर तर संमेलन परिसराच्या सजावटीची जबाबदारी आहे. ही तरुण मंडळी सध्या दिवस-रात्र सजावटीच्या कामात गुंतली आहेत. त्यांची तयारी आता अंतिम टप्प्यात आली आहे. विशाल नवाथे आणि हर्षद माने या डहाणूकर कॉलेजच्या दोन माजी विद्यार्थ्यांच्या संकल्पनेतून सजावट करण्यात येत आहे. विशाल आणि हर्षदबरोबर कॉलेजच्या २० विद्यार्थ्यांची टीम आहे.
ट्रंक उघडणार
ज्या वस्तू नाटकाला जिवंत करतात, अशा वस्तूंचा यथोचित सन्मान करण्याठी संमेलन परिसराची सजावट, नाट्यनिर्मितीमधल्या दुर्लक्षित पण महत्त्वपूर्ण घटकांनी केली जातेय. कुठल्याही नाटकाचा अविभाज्य भाग असणाऱ्या ट्रंकचा प्रामुख्यानं सजावटीसाठी वापरण्यात येतोय. मुख्य प्रवेशद्वारावर ट्रंकांचाच वापर करून दोन्ही बाजूला स्तंभ उभारण्यात येत आहेत. त्यावर मराठी रंगभूमीवरील गाजलेल्या नाटकांची नावं लिहिण्यात येणार आहेत. तसंच भल्यामोठ्या चाळणीच्या दोन भिंती देखील त्याच्या शेजारी असतील. नाटकातला प्रत्येक घटक, मग तो दिग्दर्शक, लेखक, कलाकार किंवा नेपथ्यकार असो, ही सर्व मंडळी नाट्यनिर्मितीच्या प्रक्रियेत विविध स्तरांवर घडत असतात. त्या घडण्याच्या प्रक्रियेचं प्रातिनिधिक स्वरूप या चाळणीतून दाखवण्याचा प्रयत्न असल्याचं हर्षद मानेनं 'मुंटा'शी बोलताना सांगितलं. संमेलन परिसराच्या मध्यभागी नाटकाची मुख्य ट्रंक बनवण्यात येत असून, नाट्यनिर्मितीशी संबंधित विविध घटकांचा तयात समावेश असेल.
पर्यावरणस्नेही सजावट
संमेलन परिसरातल्या सजावटीसाठी पर्यावरणपूरक साहित्य वापरण्यात येत आहे. लाकूड, रंगीत कापड यांचा प्रामुख्याने सजावटीत वापर केला जातोय. थर्माकोल आणि प्लास्टिकचा वापर सजावटीमध्ये कटाक्षानं टाळण्यात आला आहे. तसंच, सजावटीसाठी वापरल्या जाणाऱ्या 'फ्लेक्स'चासुद्धा एकांकिकांच्या सेटसाठी पुनर्वापर करणार असल्याचं हर्षद सांगतो.
सजावटीत व्यग्र
अनिरुद्ध मोरे, पवन लब्दे, मधुरा राऊत, मानसी घाटे, प्रणित म्हसकर, रुचिका धुरी, समीक्षा मेळेकर, संचित गायकवाड, तन्वी बर्वे, ऋषिकेश धामापुरकर, अदिती पांगारे, अक्षय घाडीगांवकर, ओमकार खरडे, रंजन प्रजापती, किरण ससाणे, शिवानी शेट्ये, दिपक घोगळे, प्राजक्ता म्हसकर, दीपंती साळवी, प्रसाद महाजन हे डहाणूकरचे विद्यार्थी सजावटीच्या कामात व्यग्र आहेत.
तरुणांचा सहभाग
नाट्यसंमेलनामध्ये मुंबईतल्या विविध कॉलेजांमधल्या तरुणाईला सहभागी करून घेण्यासाठी नाट्यपरिषदेकडून कॉलेजांना निमंत्रित करण्यात येत आहे. संमेलनाच्या निमित्तानं एकत्र येणाऱ्या तरुण रंगकर्मींची माहिती (डेटाबेस) नाट्यपरिषदेकडून गोळा करण्यात येईल. जेणेकरून पुढे नव्या नाटकांच्या ऑडिशनसाठी तसंच नाट्यसंबंधित कार्यक्रमांच्या वेळी त्या तरुणांशी संपर्क साधता येईल, अशी माहिती संतोष काणेकर यांनी दिली आहे. तसंच संमेलनाविषयी तरुणांमध्ये आवड निर्माण व्हावी यासाठी रुईया, डहाणूकर, व्हीजेटीआय, केळकर कॉलेजच्या तरुण रंगकर्मींना संमेलनांच्या पूर्वरंगातील कार्यक्रमात सहभागी करून घेण्यात आलं होतं.