कॉलेजांमध्ये सध्या फ्रेशर्स पार्ट्यांची लाट असून, त्यापैकी बऱ्याचशा पार्ट्या 'अनऑफिशिअल' असल्याचं दिसून येतंय. त्यामुळे या पार्टीमध्ये जर काही बरं-वाईट घडलं तर त्याची जबाबदारी कुणाची, असा प्रश्न विचारला जातोय.
मानसी गोखले, पोदार कॉलेज
नव्यानं कॉलेजमध्ये दाखल झालेल्या विद्यार्थ्यांसाठी फ्रेशर्स पार्टी आयोजित केली जाणं नवीन नाही. या पार्ट्यांमध्ये दिसणारा झगमगाट, त्यात होणारी धमाल याची कॉलेजिअन्समध्ये नेहमी चर्चा असते. कॉलेजमधल्या सीनिअर विद्यार्थ्यांकडून या पार्टीचं आयोजन केलं जातं. या पार्टीच्या नावाखाली विद्यार्थ्यांकडून बऱ्याचदा काही रक्कम उकळली जाते. कॉलेजच्या नकळत होणाऱ्या या पार्टीमध्ये काही चुकीचं घडल्यास त्याची जबाबदारी कुणाची असा प्रश्न विचारला जातोय.
फ्रेशर पार्टी हवीशी वाटत असली, तरी या पार्टीसाठी कॉलेजच्या सीनिअर्सकडून मनमानी होत असते, अशी चर्चा कॅम्पसमध्ये दबक्या आवाजात ऐकायला मिळते. बहुतेक वेळा पार्टीसाठी परवानगी घेतलेली नसते. त्यामुळे अनधिकृतपणे याचं आयोजन केलं जातं. त्यामुळे कॉलेजमध्ये पाऊल टाकणाऱ्या विद्यार्थ्यांची सुरुवातच ही अशी होते. या सगळ्याचा परिणाम कॉलेजमध्ये आलेल्या फ्रेशर्सवर होतो असं बोललं जातं. पार्टीमध्ये नाचगाणी, धांगडधिंगा होतो. अनेकदा ज्युनिअर विद्यार्थ्यांना अशा पार्टीला जायचं नसतं. पण, काही ठिकाणी जबरदस्तीनं पैसे उकळले जातात. त्यामुळे नाईलाजानं पार्टीला जावं लागतं, असं काही विद्यार्थी सांगतात. या अनऑफिशियल इव्हेंट्सबइद्दल कॉलेजला काहीच माहीत नसल्यानं त्याबद्दल तक्रार करायची कुणाकडे हे अनेकांना समजत नाही. तसंच पार्टीत होणाऱ्या संभाव्य गैरप्रकारांमुळे विद्यार्थ्यांच्या सुरक्षेचा प्रश्न निर्माण झालाय. यापूर्वी काही कॉलेजांमध्ये अधिकृतपणे फ्रेशर्स पार्टी होत होती. पण हल्ली काही कॉलेजांमध्ये कॉलेज प्रशासनाची परवानगी न घेता विद्यार्थ्यांना ट्रेकला घेऊन जाणं, क्लबमध्ये पार्टीचं आयोजन करणं केलं जातं. काही वेळा पार्टीमध्ये मद्य ठेवण्यात येतात. महागड्या ठिकाणी ठेवण्यात आलेल्या या इव्हेंट्ससाठी मुलांकडून अडीच ते तीन हजार रुपये घेतले जातात. कॉलेज या इव्हेंट्सची जबाबदारी घेत नसल्यामुळे पालकांमध्येदेखील याबाबत संभ्रमाचं वातावरण तयार झालं आहे.
धाडीची भीती
अलीकडेच विद्याविहार विभागातील एका कॉलेजच्या सीनिअर्सनी फ्रेशर्स पार्टी आयोजित केली होती. या पार्टीत यायचं असेल तर आपलं वय अठराच्या पुढे आहे हे दाखवण्यासाठी सीनिअर्सनी कॉलेजमध्ये फॉर्म्स वाटले होते. या पार्टीला येण्यासाठी प्रत्येकाकडून पाचशे रुपये घेण्यात आले. ही पार्टी कॉलेजच्या नावाखाली होत असली, तरी कॉलेज प्रशासनाला याबाबत काहीच कल्पना नव्हती. या अनऑफिशियल पार्टीमध्ये पोलिसांची धाड पडू नये म्हणून अल्पवयीन विद्यार्थ्यांना, तुमचं वय अठराच्या पुढे असल्याचं सांगणाऱ्या फॉर्मची प्रत आणायला सांगण्यात आली होती. ही पार्टी आयोजित करणारे सीनिअरदेखील अठरा वर्षांखालील होते. पार्टीची माहिती नसल्यामुळे कॉलेजनं याची जबाबदारी घेण्यास नकार दिला.