'ढासू' दिसण्यासाठी संस्कृतीच्या टिप्स

सोशल मीडियावर जिच्या प्रत्येक फोटोची चर्चा होते ती संस्कृती बालगुडे मुलींसाठी स्टाइल आयकॉन आहे. या फॅशनिस्टाने कॉलेज लाइफ फॅशनेबल होण्यासाठी मुलींना काही टिप्स दिल्या आहेत.

शाळेच्या युनिफॉर्मच्या बंधनातून मुक्त होऊन तुम्हाला हवी तशी आणि आवडणारी फॅशन इथे करायला मिळणार आहे, याचा तुम्हाला खूप आनंद होत असेल. तर अशी फॅशनेबल आणि ढासू एंट्री घ्यायला तुम्ही तय्यार असालच. तुमचा लूक आणखीन अपडेट करण्यासाठी तुम्ही वेगवेगळे प्रयोग करु शकता.

केसांपासून चप्पलांपर्यंत स्टाइल करण्यासाठी मुलींना अनेक पर्याय उपलब्ध असतात. सो गर्ल्स, याचा पुरेपूर फायदा घ्या आणि हटके लूक मिळवा. यासाठी तुम्ही सध्या चलती असलेल्या कोल्ड शॉल्डर स्टाइलचा नक्की वापर करा. अगदी प्लेन रंगांच्या टॉप्सपासून ते फंकी प्रिंट असलेल्या टॉपमध्ये कोल्ड शोल्डरचा पर्याय उपलब्ध आहे. त्याला योग्य शेड्च्या जीन्सनं अपटेड करा.

दुसरं म्हणजे, सध्या फ्लोरल प्रिंटची प्रचंड क्रेझ पाहायला मिळते. लाइट शेडमधील फ्लोरल प्रिंटच्या पँटवर प्लेन, साधा शर्ट किंवा टॉपमुळे तुमच्या लूकला ग्रेस येईल.

तुमच्या पेहरावाला योग्य अशा चप्पला वापरा. तुम्ही इतरांपेक्षा वेगळे कसे दिसाल याचा विचार करा. पण काही तरी भन्नाट करण्याच्या नादात तुमचा लूक खराब होणार नाही याची काळजी घ्या. तसंच फॅशन करण्याबरोबर करिअरचाही विचार करा आणि कॉलेज लाइफ एन्जॉय करा.