समाजोपयोगी संशोधन करा!

सध्या संशोधनाची गरज प्रत्येक क्षेत्रात आहे. एखादा व्यवसाय यशस्वी करण्यासाठी ते एखाद्या दुर्धर रोगावर औषध शोधण्यासाठी संशोधनाची आवश्यकता असते. कालानुरुप संशोधनाचं हे क्षेत्र विस्तारत आहे. आज इतर क्षेत्राप्रमाणेच संशोधन क्षेत्रातही विद्यार्थ्यांना अनेक संधी खुणावत आहेत. संशोधन क्षेत्र, त्यात असलेल्या संधी आणि या क्षेत्राचा समाजासाठी जास्तीत-जास्त उपयोग कसा करावा याचं मार्गदर्शन डॉ. अभय बंग यांनी आयसीटीच्या विद्यार्थ्यांना केलं. इन्स्टिट्यूट ऑफ केमिकल टेक्नॉलॉजीच्या वोर्टेक्स फेस्टिवलमध्ये या सेमिनारचं आयोजन करण्यात आलं होतं. या फेस्टिवलला ‘महाराष्ट्र टाइम्स’ मीडिया पार्टनर आहे.
'मास्टरक्लास' अंर्तगत ठेवण्यात आलेल्या या सेमिनारमध्ये डॉ. अभय बंग यांचं व्याख्यान हे मुख्य आकर्षण होतं. व्याख्यानात त्यांनी संशोधन क्षेत्राचं महत्त्व विद्यार्थ्यांना पटवून दिलं. संशोधन क्षेत्रात येणाऱ्या विद्यार्थ्यांनी फक्त पैशांच्या मागे न धावता समाज उपयोगी संशोधन करणं गरजेचं आहे, असा मोलाचा सल्ला त्यांनी विद्यार्थ्यांना दिला. ‘गरज ही शोधाची जननी आहे. तसंच देशबांधवांच्या गरजांचे भान राखत संशोधनकार्य चालू ठेवल्यास देशाचं भवितव्य नक्कीच उज्ज्वल आहे’ त्यांनी सांगितलं. एकदाच मिळणारं आयुष्य हे समाजाच्या कल्याणासाठी घालवा असा सल्ला त्यांनी उपस्थित विद्यार्थ्यांना दिला. विद्यार्थ्यांनी विचारलेल्या विविध प्रश्नांची मोकळेपणाने उत्तरं देऊन शंकांचं निरसन डॉ. बंग यांनी केलं.
फोटो- ऋषिकेश सोनावणे
दीपाली सकपाळ, कॉलेज क्लब रिपोर्टर