राहुल पोखरकर, ए. पी. शाह इन्स्टिट्यूट ऑफ टेक्नॉलॉजी
रोबोंपासून ते ड्रोन्सपर्यंत तंत्रज्ञानाची मांदियाळी असलेल्या टेकफेस्टची उत्सुकता संपूर्ण कॉलेजविश्वाला असते. आयआयटी मुंबईच्या या फेस्टमध्ये विविध ज्ञानरंजनपर कार्यशाळांचं आयोजन करण्यात आलं आहे. या फेस्टचा 'महाराष्ट्र टाइम्स' मीडिया पार्टनर आहे.
बनवा क्वाडकॉप्टर
'थ्री इडियट्स' चित्रपटामध्ये आपल्या लाडक्या रँचोनं तयार केलेला क्वाडकॉप्टर आठवतोय? तसा क्वाडकॉप्टर बनवण्याची संधी तुम्हाला 'क्वाडकॉप्टर' या कार्यशाळेत मिळेल. क्वाडकॉप्टरच्या हालचालींसाठी आवश्यक असणाऱ्या इंजिनीअरिंगमधील संकल्पना, इलेक्ट्रॉनिक सर्किट्स इत्यादी बाबींची माहिती यावेळी सहभागी विद्यार्थ्यांना देण्यात येईल. तसंच त्यांनी तयार केलेल्या क्वाडकॉप्टरची रिमोट कंट्रोलच्या साहाय्यानं चाचणीदेखील या कार्यशाळेत घेण्यात येणार आहे.
करू सौरऊर्जेचा वापर
एक पर्यावरणपूरक ऊर्जास्रोत म्हणून सौरऊर्जेचं महत्त्व अनन्यसाधारण असं आहे. त्यामुळे येणारा काळ हा सौरऊर्जेचा असेल असं म्हटलं तर वावगं ठरणार नाही. टेकफेस्टमध्ये होणाऱ्या 'सोलराइजर' या दोन दिवसीय कार्यशाळेत विद्यार्थ्यांना सोलर फोटो वोल्टाइक तंत्रज्ञानाबद्दल माहिती दिली जाईल. तसंच सौरऊर्जेवर चालणारा मोबाइल चार्जर आणि लाइट सीकिंग बॉट तयार करण्याची संधी विद्यार्थ्यांना या कार्यशाळेत मिळेल.
'डिजिटल मार्केटिंग'वर बोलू काही!
सध्याचा काळ हा सोशल मीडियाचा आहे. त्यामुळे सध्या उपलब्ध असलेल्या फेसबुक, ट्विटर, इन्स्टाग्राम, पिंटरेस्ट यासारख्या विविध सोशल नेटवर्किंग साइट्सवर प्रभावीपणे मार्केटिंग कसं करावं, याबाबतचं मार्गदर्शन विद्यार्थ्यांना 'डिजिटल मार्केटिंग' या कार्यशाळेत मिळेल. सोशल मीडिया स्ट्रॅटेजी कशी तयार करावी, कन्टेंट कसा तयार करावा, क्लीक-थ्रू रेशोमध्ये वाढ कशी करता येईल, की-वर्ड्सचा वापर कसा करावा यासारख्या अनेक प्रश्नांची उत्तरं या कार्यशाळेत मिळू शकतील.
'अंडरवॉटर रोबोटिक्स'चं जग
अंडरवॉटर रोबोटिक्स ही रोबोटिक्सची एक उदयोन्मुख शाखा असून अशा पद्धतीच्या रोबोटचा वापर हा वैज्ञानिक मोहिमांसाठी तसंच सैन्यदलांमध्ये केला जातो.'अंडरवॉटर रोबोटिक्स' या कार्यशाळेत विद्यार्थ्यांना पाण्यातील रोबोटचे विविध प्रकार, त्यांची कार्यप्रणाली, रोबोटमध्ये वापरले जाणारे विविध सेन्सर्स यांची माहिती मिळेल. अशा पद्धतीचा रोबोट तयार करण्याची संधीसुद्धा या कार्यशाळेत मिळणार आहे.