एनएसएसच्या विद्यार्थ्यांचा पुढाकार
समाजसेवेसाठी नेहमी तत्पर असणारे कॉलेजांच्या एनएसएस युनिटचे विद्यार्थी स्वस्थ बसलेले नाहीत. घरबसल्या सोशल मीडियाच्या मदतीनं करोनाविरोधातील लढ्यात ते आपलं योगदान देत आहेत.
मीनाक्षी शिंदे, साठ्ये कॉलेज
वर्षभर समाजसेवेच्या विविध उपक्रमांमध्ये सहभागी होणारे एनएसएसचे विद्यार्थी करोनाच्या संकटकाळातही काही ना काही करू पाहताहेत. करोनाविरोधातील लढ्यात त्यांनी आपला सक्रिय सहभाग घेतला आहे. विविध माध्यमातून ते जनजागृती करताना दिसताहेत.
पोस्टर्स, लेखन
हिंदुजा कॉलेजच्या एनएसएसच्या स्वयंसेवकांनी लॉकडाऊन सुरू झाल्यानंतर घरुनही आपलं कर्तव्य कशा प्रकारे पार पाडता येईल यावर विचार करण्यास सुरुवात केली. करोनाशी लढा देण्यासाठी काहीतरी करण्याची त्यांची इच्छा होती. सोशल मीडियाच्या माध्यमातून जनजागृती करण्याचा निर्णय त्यांनी घेतला. लोकांना संदेश देण्यासाठी एक वाक्य त्यांनी निवडलं आणि त्यातला एक-एक शब्द प्रत्येकानं घेतला. तो शब्द लिहून प्रत्येकानं त्याच्याबरोबर फोटो काढला. या फोटोंचा कोलाज करून त्या माध्यमातून करोनाविषयी संदेश देण्यात आला. तसेच, 'स्टे होम' थीमवर आधारित लिखाण, पोस्टर्स शेअर करण्याचं आवाहन विद्यार्थ्यांना करण्यात आलं. विद्यार्थ्यांनाही जनजागृतीच्या या मोहिमेत सहभागी करून घेण्यात आलं आहे.
एकतेचा संदेश
एचआर कॉलेजच्या एनएसएस युनिटच्या एका स्वयंसेवकानं सुचवलेल्या कल्पनेनुसार एनएसएस युनिटच्या पेजवर, लोकांना घरी राहण्याचा संदेश देणारे कोलाज तयार करून पोस्ट करण्यात आले. सर्व जण आपापल्या घरात असले, तरीही एकमेकांसोबत आहेत, असा प्रतीकात्मक संदेश याद्वारे देण्यात आला. लॉकडाऊनच्या या दरम्यान काय काळजी घ्यायला हवी याची माहिती देणारी स्वयंसेवकांनी तयार केलेली पोस्टर्स शेअर करण्यात येत आहेत. येत्या काही दिवसांत योग, व्यायाम यासंदर्भात प्रशिक्षण घेतलेल्या स्वयंसेवकांचे व्हिडीओज पोस्ट करायचा त्यांचा विचार आहे.
तणावाला सामोरं जाताना
आयआयटी मुंबईच्या एनएसएस विभागाच्या इन्स्टाग्राम पेजवर 'क्वारंटेन्शन्ड' हा उपक्रम राबवण्यात येत आहे. पूर्ण वेळ घरातच राहिल्यामुळे कुणालाही मानसिक ताण येऊ शकतो. त्यामुळे हा ताण कमी करण्याच्या उद्देशानं ६ एप्रिलपासून हा उपक्रम सुरू करण्यात आला आहे. याअंतर्गत काऊन्सेलर शिवानी मनचंदा यांचे सोशल मीडिया, फेक न्यूज, वेळेचा सदुपयोग, कार्यशीलता अशा विविध विषयांवरील लघुलेख इथे प्रसिद्ध केले जातात.