आरेतली वृक्षतोड थांबवण्यासाठी आंदोलन सुरू असतानाच, झेविअर्स कॉलेजच्या विद्यार्थ्यांनीही आरे बचावसाठी पुढाकार घेतला आहे. त्यांनी त्यासाठी 'मॅन व्हर्सेस वाइल्ड'चा सूत्रसंचालक बेअर ग्रिल्सला पत्र लिहिलं आहे. तसंच आरेसाठी विद्यार्थी, नागरिकांना एकत्र आणण्यासाठी प्रयत्न केला जातोय...
सूरज खरटमल, रुपारेल कॉलेज
मेट्रोच्या कारशेडसाठी आरे परिसरात होणारी वृक्षतोड थांबावी म्हणून होणाऱ्या आंदोलनाला धार चढली आहे. पर्यावरणप्रेमी नागरिक तसंच विद्यार्थी त्यासाठी रस्त्यावर उतरले आहेत. झेविअर्स कॉलेजच्या विद्यार्थ्यांनीही यासाठी पुढाकार घेतला आहे. आरेमधली हिरवाई वाचावी म्हणून विद्यार्थ्यांकडून काश फाऊंडेशनच्या सहकार्यानं विविध पातळ्यांवर प्रयत्न केले जात आहेत. आरेसाठी पर्यावरण वाचवाचे नारे बुलंद केले जाताहेत.
मेट्रो कारशेडसाठी पर्यायी जागेचा विचार करावा आणि आरेच्या जंगलाचा विचार सोडून द्यावा असा आग्रह विद्यार्थी धरणार आहेत. झेवियर्स कॉलेजचे प्राध्यापक डॉ. अवकाश जाधव यांच्या मार्गदर्शनाखाली विद्यार्थ्यांनी थेट डिस्कव्हरी चॅनेलच्या 'मॅन वर्सेस वाइल्ड' कार्यक्रमाचा सूत्रसंचालक बेअर ग्रिल्सला पत्र लिहिलं आहे. आरेचं जंगल वाचवण्यासाठी अनेक कॉलेजांतले विद्यार्थी आणि नागरिकांना एकत्र आणण्याचा प्रयत्न केला जातोय. आरे परिसरात असलेले वृक्ष, प्रचंड जैवविविधता, दुर्मीळ नैसर्गिक ठेवा, या परिसरात आढळणारे पक्षी, प्राणी यांची माहिती लोकांना कळावी यासाठी प्रदर्शन भरवण्यात येऊन त्याची माहिती लोकांपर्यंत पोहोचवली जाणार आहे. या जंगलात वर्षानुवर्षं वास्तव्य करणाऱ्या आदिवासींना या प्रकल्पामुळे बेघर व्हावं लागेल. तसंच या परिसरात बेसुमार वृक्षतोड करण्यात आल्यास मुंबईसाठी ते किती धोकादायक ठरू शकेल हे लोकांच्या लक्षात आणून देण्यात येईल. गरज पडल्यास मुंबईतल्या कॉलेजांना एकत्र करून मुंबईत पथसंचलनसुद्धा केलं जाणार आहे. पर्यावरणाचा झपाट्यानं होत असलेला ऱ्हास थांबवण्यासाठी कार्यरत असलेल्या काश फाऊंडेशनसोबत झेविअर्सचे विद्यार्थी काम करत आहेत. वेगवेगळे उपक्रम राबवत आरेचं जंगल वाचवण्यासाठी झेविअर्स कॉलेजकडून मोठ्या प्रमाणावर प्रयत्न केले जात आहेत.