ऑफिसमधली कुजबूज

ऑफिस आणि गॉ‌सिप्स या दोन्ही एकाच नाण्याच्या दोन बाजू आहेत, असं म्हटलं तरी चुकीचं ठरणार नाही. कामादरम्यान होणारी ही कुजबूज करण्यात अनेकदा महिला कर्मचारीही आघाडीवर दिसतात.

००००

मुंबई टाइम्स टीम

ऑफिसच्या कामातून जरा विरंगुळा म्हणून प्रत्येक ऑफिसात थोड्याफार प्रमाणात ऑफिस गॉसिप्स होतच असतात. व्हॉट्सअॅप, फेसबुक, स्मार्टफोन्स अशा नव्या तंत्रज्ञानाच्या युगात तर या गॉसिप्सना आणखीच वाव मिळालाय. कुणाला प्रमोशन मिळालं, कुणाचं हुकलं, कुणाची कुणाशी किती दोस्ती कुणाची दुश्मनी... अशाप्रकारे अनेक विषयांवर हे गॉसिप होत असतं. ऑफिसच्या फावल्या वेळेत गॉसिपिंगचे क्षण विरंगुळ्याचं काम करत असले, तरी याचं प्रमाण वाढल्यास हेच गॉसिपिंग आपला घरातला हक्काचा वेळही खाण्याची भीती असते. त्यामुळे स्वतःच्या अमूल्य वेळेबरोबरच स्वतःची मानसिक शांती आणि घरातल्यांची डोकेदुखी वाढण्याचाही धोका असतो. विशेषतः महिलांनी तर हे जास्त लक्षात घ्यायला हवं; कारण त्या मुळातच थोड्या जास्त संवेदनशील आणि एखाद्या गोष्टीत स्वतःला गुंतवून घेणाऱ्या असतात.

स्वतःला स्वीच ऑफ करा

मर्यादेपेक्षा अधिक काळ गॉसिपिंग केल्यास त्याचा वैयक्तिक आणि कौटुंबिक जीवनावर परिणाम होत असतो. अनेक महिलांना पटकन 'स्वीच ऑफ' होता येत नाही. त्यामुळे ऑफिसमधील चर्चा त्या घरातही करतात. खूप भावनिक असल्यानेही त्या ऑफिसमधील विविध प्रकरणांत ओढल्या जातात; पण आपण घरी आल्यावर घरात ऑफिसच्या गोष्टी आणायच्या नाहीत, हे आधी स्वतःला समजवावं लागेल. त्यासाठी स्वतःच्या मनावर ताबा हवा आणि मुख्य म्हणजे व्यावसायिक आयुष्य आणि वैयक्तिक आयुष्य वेगवेगळं ठेवता यायला हवं, असा सल्ला मॅनेजमेंट कन्सल्टंट डॉ. मेधा ताडपत्रीकर यांनी दिला.