मुंबई टाइम्स टीम
सध्या करोना जगभर थैमान घालत आहे. त्यामुळे भीतीदायक वातावरण आहे. तसंच लॉकडाऊनमुळे घरी असून अनेकांच्या वेळापत्रकात कमालीचा बदल झाला आहे. अनेकांच्या झोपेच्या वेळा आणि सवयींमध्ये बदल झाला आहे. त्याचा परिणाम शरीरातील अंतर्गत क्रियेवर होतो. थकवा, चिडचिडेपणा आणि मानसिक गोंधळ हे सर्व लक्षणं तुमच्या आरोग्यास हानी पोहोचवू शकतात.
घरीच असल्यामुळे अनेकजण दुपारीही झोप घेतात. त्याचा रात्रीच्या झोपेवर परिणाम होतो. त्यामुळे दुपारी अर्ध्या तासापेक्षा जास्त झोपू नका. त्याशिवाय दिवसाचं वेळापत्रक आखा. घरकाम, ऑफिसचं काम, ब्रेक आणि स्वत:च्या मनोरंजनासाठी वेळ काढा. यामुळे तुमच्या मानसिक आरोग्यावर परिणाम होणार नाही. एकंदरच दिवसाचं प्लॅनिंग करणं महत्त्वाचं आहे. सध्याच्या काळात शारीरिक आणि मानसिक आरोग्याची काळजी कशी घेतली पाहिजे, याविषयी...
सातत्य हवं
झोपायच्या आणि उठायच्या वेळा ठरवून ठेवा. त्यात सातत्य असायला हवं. तुम्हाला जर दिवसा थकल्यासारखं वाटत असेल तर आराम करा. एक डुलकी काढा, असं तज्ज्ञ सांगतात. कमीत कमी उजेडात झोपा म्हणजे शांत झोप लागेल. तुम्हाला जर उजेडात झोपण्याची सवय असेल तर काळ्या रंगाचे पडदे लावून घ्या; जेणेकरुन शांत झोप लागण्यास मदत होईल.
गॅजेट ठेवा दूर
दिवसातला दीड तास तुम्ही सोशल मीडिया, ई-मेल आणि टीव्ही यांपासून दूर राहण्याचा प्रयत्न करा. हे काही दिवस फॉलो केल्यानंतर हळूहळू वेळ वाढवा. दीड तास दूर राहू शकत नसाल तर १५ मिनिटांपासून सुरुवात करा.
व्यायाम-आहारावर लक्ष
घरात असल्यामुळे शरीराची फारशी हालचाल होत नाही. त्यामुळे घरच्या घरी व्यायाम करा. ऑनलाइन व्हिडीओ बघून नवनवीन व्यायामप्रकार शिका. झोपण्याच्या अर्धा तास आधी काहीही खाणं टाळा. खण्या-पिण्यावर नियंत्रण असणं गरजेचं आहे.
संकलन- वेदांगी काण्णव, मुंबई विद्यापीठ