सोशल मीडियावरही ‘गजर’

अनुश्री पवार,अक्षय ढवण कॉलेज क्लब रिपोर्टर

आपल्या जबरदस्त वादनाने शोभायात्रांना शोभा आणणारी ढोल-ताशा पथकं सोशल मीडियाही गाजवताहेत. फेसबुक, युट्यूब, अॅप सगळीकडेच ढोल-ताशांची जोरदार झिंग पाहायला मिळत असून, त्यांना प्रचंड संख्येनं लाइक्स मिळताहेत.

उत्सवांमधल्या मिरवणुका असो वा पाडव्याच्या शोभायात्रा…ढोल-ताशे कडाडू लागले की प्रत्येकाची पावलं आपोआप थिरकू लागतात. मराठमोळ्या संस्कृतीचा गजर करणारी ही ढोल-ताशा पथकं आता प्रत्यक्ष मिरवणुकांबरोबरच सोशल मीडिया देखील गाजवू लागली आहेत. फोटो-व्हिडिओ आणि पोस्टसच्या माध्यमातून तिथे त्यांचा जोरदार गाजावाजा होतोय.

सुमारे दोन वर्षांपूर्वी सिद्धेश माने आणि आदित्य नाडकर्णी या दोन मुंबईकर तरुणांनी ‘ढोलाची झिंग आणि ताशाची तर्री’ हे फेसबुक पेज तयार केलं आणि बघता-बघता ते तुफान लाइक झालं. जगभरातल्या ढोल-ताशा पथकांचे फोटो आणि व्हिडिओ या पेजवर पाहायला मिळतात. या पेजचे सध्या १ लाख ४० हजाराहून अधिक फॉलोअर्स आहेत. या फॉलोअर्सपैकीच अनेकजण या पेजवर त्यांच्या पथकाचे फोटो व व्हिडिओ पाठवतात. ढोल-ताशांची संस्कृती सगळ्यांपर्यंत पोहोचावी या उद्देशाने हे पेज सुरू करण्यात आलं होतं. त्यामुळे तुम्ही कुठल्याही शहरातले असाल तरी तुमच्या शहरातल्या ढोल-ताशा पथकांची, मिरवणुकांची माहिती या पेजवर बघता येईल.

पथकातील अनेक वादक त्यांच्या वादनाचे फोटो तर काढतातच. पण त्याचबरोबरीने स्लो मोशन व्हिडिओ, बूमरँग व्हिडिओ शूट करून सोशल मीडियावर शेअर करतात. या व्हिडीओंना फेसबुकवर उत्तम प्रतिसाद मिळतो. तसंच एखाद्या पथकाचं मिरवणुकीतलं संपूर्ण वादन पाहायचं असेल तर तेही शक्य आहे. मुंबई-पुण्यापासून संपूर्ण महाराष्ट्रातल्या अनेक ढोल-ताशा पथकांची स्वतःची युट्यूब चॅनेल्स आहेत. आरंभ ढोल-ताशा पथक, मोरया ढोल पथक, संस्कृती वाद्य पथक या मुंबईतल्या ढोल-ताशा पथकांच्या अधिकृत चॅनेल्सना तुम्हाला सबस्क्राइब करता येऊ शकतं. एखाद्या पथकाचं युट्यूब चॅनेल सापडत नसेल, तर त्या ढोल पथकाच्या नावाने व्हिडिओ सर्च केलात तरी वादनाचे अनेक व्हिडिओ पाहायला मिळू शकतील. गिरगाव ध्वज पथकाचं तर प्ले स्टोअरवर स्वतःचं अॅप आहे. या अॅपमार्फत विविध फोटो, व्हिडिओ आणि पथकाबद्दलची अधिकृत माहिती लोकांपर्यंत पोहोचवली जाते. प्रत्येक ढोल-ताशा पथकांची स्वतंत्र अशी फेसबुक पेजेससुद्धा आहेत.

फेसबुक लाइव्ह
प्रत्येक पथकाला मिळालेल्या सुपाऱ्यांच्या वेळा, ठिकाणं लोकांपर्यंत पोहोचवण्याचं सर्वोत्कृष्ट माध्यम म्हणजे ही फेसबुक पेजेस. फेसबुक लाइव्ह हा एक नवीन ट्रेंडसुद्धा काही पथकं वापरताना दिसतायेत व त्यांना मिळणारा प्रतिसाद अफलातून आहे. पथकाच्या सभासद नोंदणीसाठी सोशल मीडियाचा सर्वात जास्त वापर केला जातो. त्याचबरोबर विविध फोटो, व्हिडिओ व पोस्टसच्या माध्यमातून प्रत्येक पथक स्वतःला अपडेट ठेवत असतं.