तिचं 'डूडलिंग' भावविश्व

एखाद्याला गिफ्ट देणं हा अपल्यातील अनेकांसाठी मोठा कठीण प्रसंग असतो. बाजारात अनेक पर्याय उपलब्ध असतात. पण त्यात तो आपुलकीचा 'टच' नसतो. मात्र आता तुमच्या आठवणी, एकत्र अनुभवलेले क्षण, केलेली मज्जा-मस्ती सांगा आणि या सगळ्याचा समावेश असलेलं, कोणालाही कुठल्याही प्रसंगी देण्यासाठी खास पर्सनलाईज्ड गिफ्ट तुमच्या दिमतीला असेल. चर्चगेटच्या एच.आर. कॉलेजमध्ये शिकणाऱ्या श्रेया शहा हिने 'डूडलिंग' या अनोख्या कलाप्रकाराच्या माध्यमातून दैनंदिन जीवनात उपयोगी पडणाऱ्या अनेक गोष्टींना आणि भेटवस्तूंना एक अनोखा कलास्पर्श दिला आहे.

कॉफी मग, पीलो-कव्हर्स, फोटोफ्रेम, मोबाईल केस यांसारख्या अनेक वस्तूंना सुशोभित करण्याचं काम श्रेया मोठ्या यशस्वीपणे पार पाडते. खरंतर सुरुवातीला स्वतःची रुम डेकोरेट करण्यासाठी तिने 'डूडलिंग'चा पर्याय निवडला आणि छंद असलेल्या 'डूडलिंग' वेडानं कधी तिला तरुण उद्योजिका बनवलं ते तिचं तिलाच कळलं नाही. आपल्या मैत्रिणींच्या सांगण्यावरुन तिने मग 'पोस्टरगली' नावाच्या वेबसाईटवर आर्टिस्ट म्हणून काम करायला सुरुवात केली आणि बघता बघता तिने डिझाईन केलेल्या वस्तूंना खूप मागणी मिळू लागली. आता श्रेया स्वतंत्रपणेही या ऑडर्स घेते. हॅरी पॉर्टर,कोल्ड प्ले, गेम ऑफ थ्रॉन्स, फ्रेन्ड्स, फूड, सिटीलाईफ अशा अनेक भन्नाट थिम्सना घेऊन तर ती चित्र रेखाटतेच पण ग्राहकाच्या विशेष मागणीनुसार ती 'डूडलिंग' करते. नुकताच तिने 'डूडल सूप' हा स्वतःचा डूडलिंगचा व्यवसाय सुरू केला आहे आणि त्याला लहानांपासून ते अगदी मोठ्यांपर्यंत सगळ्यांचाच भरघोस प्रतिसाद मिळत आहे. भविष्यात वेगवेगळ्या प्रदर्शनांमधून आपली कला लोकांपर्यंत पोहोचवणं तसंच आतापर्यंत केवळ भारतात उपलब्ध असलेल्या तिच्या उत्पादनांना आंतरराष्ट्रीय बाजारपेठेपर्यंत पोहोचवणं ही तिची स्वप्न आहेत. 'वूमन्स डे'च्या निमित्ताने, तरुण वयात स्वतःच्या सर्जनशीलतेच्या जोरावर गगनभरारी घेणारी श्रेया शहा सांगते, 'आपल्या छंदाचं व्यवसयात रुपांतर करण्यासाठी सुरुवातीला अनेक अडथळ्यांची शर्यत पार करावी लागती. मात्र स्वतःवर, स्वतःच्या कर्तृत्वावर ठाम विश्वास असेल तर लोकांच्याही मनात तो रुजायला वेळ लागत नाही.'