… तर गमवाल डोळे!

शब्दुली कुलकर्णी, कॉलेज क्लब रिपोर्टर

रात्र-रात्र अंधारात चॅटींग करणं ही आजकालच्या तरुण पिढीची जीवनशैली बनत चाललीय. आई-बाबा ओरडतात म्हणून चादरमध्ये डोकं खुपसून, हळूच अंधारात चॅटींग करण्याचे पर्याय शोधून काढले जातात. मात्र यामुळे डोळ्यांच्या विकारांचं प्रमाण वाढत आहे. तसंच अंधारात स्मार्टफोन वापरल्याने एका डोळ्याला अंधत्व येण्याची समस्याही समोर येत आहे. रात्री झोपताना मोबाइल उशाशी घेऊन झोपण्याची सवय असणं ही बाब आता काही नवीन नाही. पण या सवयीमुळे होणारे दुष्परिणाम दिवसेंदिवस अधिक गंभीर रुप धारण करत आहेत. रात्री पडल्या-पडल्या एका कुशीवर राहून चॅटींग केलं जातं किंवा मोबाइलवर चित्रपट बघितले जातात. अशावेळी एक डोळा उशीपाशी असल्याने बंद असतो. परिणामी, दुसऱ्या डोळ्यावर सगळा ताण येतो. त्यामुळे एका डोळ्याला अंधत्व येण्याचे प्रमाण वाढत आहे. सकाळी उठल्यानंतर लगेचच मोबाइल उशाशी असल्यामुळे काय मेसेजेस आलेत हे तपासलं जातं. उठल्या-उठल्या मोबाइलचा प्रकाश सहन न झाल्यामुळे डोळ्यांवर ताण येतो. यामुळे उद्भवणाऱ्या समस्या नाकारू शकत नाहीत. त्याशिवाय रात्री-अपरात्री चॅटींग केल्याने त्याचा झोपेवर परिणाम होतो. त्यामुळे निद्रानाश, वेळी-अवेळी झोप येणं आणि झोप अपुरी झाल्यामुळे होणारे त्रास यासारख्या समस्यादेखील उद्धभवत आहेत.