मैत्रीला द्या ‘स्पेशल टच’

ज्ञानेश्वरी वेलणकर, कॉलेज क्लब रिपोर्टर

‘फ्रेंडशिप डे’ साजरा करण्याचेही नवनवीन फंडे तयार झाले आहेत. मग यंदाही असं काहीतरी करा जे तुम्हाला आयुष्यभर लक्षात राहील. कसं? ते आम्ही तुम्हाला सांगतो.

मैत्री या छोट्याशा दोन अक्षरी शब्दामध्ये प्रचंड ताकद आहे. मैत्रीची जाणीव नव्याने करून देणारा आणि ती अधिक खुलवण्याचं काम करणारा दिवस म्हणजे 'फ्रेंडशिप डे'! पूर्वी मित्र-मैत्रिणींना भेटून किंवा फोनवरून शुभेच्छा देऊन हा दिवस साजरा केला जायचा. मात्र ‘फ्रेंडशिप डे’ साजरा करण्याचेही नवनवीन फंडे तयार झाले आहेत. मग यंदाही असं काहीतरी करा जे तुम्हाला आयुष्यभर लक्षात राहील. कसं? ते आम्ही तुम्हाला सांगतो. 'मुंटा'च्या या खास 'फ्रेंडगाईड'सोबत!

- केवळ व्हॉट्सअपवर मैत्रीचं महत्त्व सांगणारे मेसेजेस करण्यापेक्षा तुमच्या मित्राला किंवा मैत्रिणीला एखाद्या पत्राद्वारे शुभेच्छा द्या. त्यांचं तुमच्या आयुष्यात काय स्थान आहे हे तुमच्याच शब्दांत त्यांना सांगा. यामुळे त्यांना अधिक आनंद होईल.
- तुमची जर शब्दांवर हुकूमत असेल तर मैत्रीवर आधारित एखादी छान कविता करा आणि आपल्या मित्र-मैत्रिणींना ती आवर्जून ऐकवा.
- बाजारातून तयार गिफ्ट्स आणून आपल्या फ्रेंड्सना देण्यात मजा नाही दोस्तहो. त्यामुळे यंदा, छोटीशीच का होईना पण एक भेट स्वतः तयार करा. मग ते ग्रीटिंग कार्ड असेल वा फोटोफ्रेम. त्या गिफ्टला तुमचा असा 'स्पेशल टच' मिळू दे.
-मैत्री होताना सगळ्यात आधी तुम्ही जिथे भेटला होतात, त्याच जागी पुन्हा एकदा भेटण्याचं ठरवा. तिथे जाऊन जुन्या आठवणींना उजळा द्या.
-तुमच्या मित्राला किंवा मैत्रिणीला आवडतो असा एखादा पदार्थ खास त्यांच्यासाठी तयार करा आणि त्यांना खाऊ घाला.
-आजकाल शॉर्टफिल्म तयार करण्याचा खूप ट्रेंड आहे. त्यामुळे तुमच्या मैत्रीवर अधारित एखादी शॉर्टफिल्म तयार करण्याची कल्पना कशी वाटते? अशी एखादी मस्त शॉर्टफिल्म तयार करा आणि आपल्या ग्रुपला सरप्राइज द्या.
- मित्र-मैत्रिणींनी एकत्र भेटून एखाद्या अनाथाश्रमाला भेट द्यायचं प्लॅन करा. त्या मुलांसोबत मैत्रीची नवीन सुरुवात करता येईल.