मुंबई टाइम्स टीम
इंटरनेटवर सर्फिंग करत असताना तुमची खासगी माहिती किंवा डेटा सुरक्षित राहिलच याची खात्री नसते. त्यामुळे तुमची महत्त्वाची माहिती आणि डेटा सुरक्षित ठेवण्यासाठी तुम्ही व्हीपीएनचा वापर करू शकता. यापैकी काही पर्याय जाणून घेऊ या...
हाइड आयपीव्हीपीएन
तुमची महत्त्वाची माहिती सुरक्षित ठेवण्यासाठी हा उत्तम आणि वेगवान पर्याय आहे. हाइड आयपीव्हीपीएनचा वापर करून तुम्ही एकाच वेळी तीन उपकरणं कनेक्ट करू शकता.
ट्रस्ट डॉट झोन
या व्हीपीएन सर्व्हिसद्वारे तुम्ही योग्य त्या इंटरनेट स्पीड सोबतच तुमचा डेटा सुरक्षित ठेवू शकता. ही सुविधा निःशुल्क नसून वापरताना काही रक्कम आकारली जाते. या सुविधेत सर्व्हर्सचं जाळं लहान आणि मर्यादित स्वरूपाचं असतं.
टनेलबीअर व्हीपीएन
या सुविधेद्वारे तुम्हाला साधारणपणे प्रति महिना पाचशे एमबी डेटा रेट मिळू शकतो. या सुविधेद्वारे एकाच अकाऊंटवर जवळपास पाच उपकरणं तुम्ही सुरक्षितपणे वापरू शकता. टनेलबीअरद्वारे ओपन व्हीपीएन या प्रोटोकॉलचा वापर केला जातो.
हाइड डॉट मी व्हीपीएन
या सुविधेद्वारे तुम्हाला अतिशय सोप्या पद्धतीनं आणि वेगानं काम करणं शक्य होतं. या व्हीपीएनचे जवळपास ५५ देशात १४०० सर्व्हर्स आहेत.
आयपी व्हॅनिश व्हीपीएन
या व्हीपीएनचं जाळं जवळपास ५१ देशात पसरलं आहे. या सुविधेद्वारे एकाचवेळी जवळपास १० कनेक्शन्स करणं शक्य होत असल्यामुळे हे व्हीपीएनसुद्धा डेटा सिक्युरिटीसाठी एक उत्तम पर्याय ठरू शकेल.
प्रायव्हेट इंटरनेट ॲक्सेस व्हीपीएन
डेटा स्पीड आणि एकाचवेळी करता येण्यासारखी कनेक्शन्स या दृष्टीने ही सेवादेखील एक उत्तम पर्याय ठरू शकते. याचा सर्व्हर रशियामध्ये सपोर्ट करत नाही.
नोर्ड व्हीपीएन
ऑनलाइन ॲक्टिव्हीटीज सुरक्षित करण्यासाठी हा उत्तम आणि वेगवान पर्याय आहे. यामध्ये जवळपास पाच हजार सर्व्हर्सचा समावेश आहे. या सुविधेमध्ये ॲड ब्लॉकिंगसारखी काही महत्त्वपूर्ण वैशिष्ट्य उपलब्ध आहेत.
शब्दांकन - केतकी मोडक, विद्यावर्धिनीज कॉलेज