मुंबई टाइम्स टीम
नवीन नोकरी मिळते, तेव्हा अनेक शंका मनात असतात. नवीन ऑफिसमध्ये मित्र-मैत्रिणी मिळतील का? नवीन बॉसला माझं काम आवडेल का? नवीन ठिकाणी वातावरण कसं असेल? असे एक ना अनेक प्रश्न आपल्याला पडतात. तुमचे नवीन सहकर्मचारी कितीही मोकळ्या स्वभावाचे असू दे, मॅनेजरसोबत तुमचं चांगलं नातं निर्माण झालेलं असू दे, तुम्हाला तुमचं नवीन काम कितीही मनापासून आवडू दे; पण नवीन नोकरीच्या पहिल्या महिन्यात तुम्ही जास्त काळजीपूर्वक वागायला हवं. नवीन ऑफिसचं संपूर्ण काम कसं चालतं, सोबतचे लोक ऑफिसमध्ये कसे वावरतात हे एका झटक्यात समजत नाही. हळूहळू याची सवय होते. सगळ्यांसोबत चांगलं नातं निर्माण करण्यासाठी आणि तुमची चांगली प्रतिमा निर्माण करण्यासाठी या काही गोष्टी टाळल्यात, तर नक्कीच मदत होईल. मात्र, या गोष्टी कुणीही ध्यानात घेत नाहीत. त्या कितीही आवश्यक असल्या, तरी दुर्लक्ष करून आपण आपल्याच तोऱ्यात कामाला सुरुवात करतो.
सगळ्याच गोष्टींची माहिती करून घेणं : थोड्याच दिवसांत सगळ्या ऑफिसची आणि तुमच्या आजूबाजूच्या लोकांची माहिती काढण्याचा प्रयत्न करू नका. कोण नक्की कोण आहे आणि त्या व्यक्तीचं काम काय, असे प्रश्न सुरुवातीच्या काही दिवसांतच विचारू नका. जरा वेळ जाऊ द्या. यामुळे तुमची प्रतिमा कष्टाळू किंवा मेहनती होण्याऐवजी 'चांभार-चौकशा करणारे' अशी व्हायला वेळ लागणार नाही. तुमच्या या स्वभावाचा सोबत काम करणाऱ्यांना वैताग येऊ शकतो.
सहकर्मचाऱ्यांबद्दल मतं मांडणं : अगदी काहीच दिवसांत नवीन लोकांबद्दल, त्यांच्या स्वभावाबद्दल मतं मांडणं बरोबर नाही. कोणत्याच व्यक्तीला इतक्या कमी वेळात समजून घेता येत नाही. तुमच्याबद्दल जास्त माहिती नसताना काही मतं मांडणं जसं तुम्हाला आवडणार नाही, तसंच त्यांच्याही बाबतीत आहे, हे लक्षात ठेवा. आपला आवाका कामपुरताच मर्यादित ठेवा. आजूबाजूच्या लोकांबद्दल मतं बांधण्याआधी निरीक्षण करा, विचार करा, समजून घ्या आणि वेळ घेऊन मगच अंदाज बांधा.
तुम्हालाच सगळं माहिती आहे, असं वाटून घेणं : तुम्ही आत्ता करताय तेच काम आधी कितीही वर्षं करत असलात, तरी या ठिकाणी तुम्ही नवीन आहात, हे विसरू नका. कायम नवीन गोष्टी शिकून घेण्याची वृत्ती आपल्यामध्ये असायला हवी. जे काम करत आहात, त्यात तुम्ही माहीर असण्यात चूक काहीच नाही; पण 'मला सगळंच येतं' ही वृत्ती मात्र नक्कीच बरोबर नाही. कामाच्या ठिकाणी स्वतःचा विकास करून घ्यायचा असेल, तर नवीन सगळं शिकण्याची वृत्ती ठेवली पाहिजे.
विनोद आणि उपरोधाला आळा : सोबतच्या लोकांसोबत मैत्री नक्कीच करा; पण कोणत्याही प्रकारचे विनोद करण्याआधी किंवा उपरोधानं बोलण्याआधी विचार करा. कदाचित तुमचे काही विनोद त्यांना आवडणारही नाहीत आणि मग त्याचे परिणाम तुम्हाला पुढं जाऊन भोगावे लागतील. त्या सगळ्यांना नक्की कोणत्या प्रकारचे विनोद आवडतील, हे हळूहळू तुम्हालाही समजेल आणि यात काही फार अवघडही नाही.
गॉसिपिंग नको : ऑफिस सुरू केल्याकेल्या गॉसिपिंग नको. स्वत:चा वेगळा ग्रुप करण्याचाही प्रयत्न करू नका. मुख्य प्रवाहात राहा. एखाद्याविषयी पूर्वग्रह मनात बाळगू नका. कुणी कितीही एखाद्याविषयी काहीही मनात भरवलं, तरी तुम्ही स्वत:हून त्या माणसाला पारखल्याशिवाय त्याच्याबाबत आधीच मतं तयार करून घेऊ नका.
संकलन : अनुजा मुळे