दिवाळी म्हणजे फराळ, फटाके आणि सुरांनी सजलेली रम्य दिवाळी पहाट. यंदाच्या दिवाळीत अनेक तरूण कलाकार आपली कला सादर करताना दिसणार आहेत. हे चमचमते तारे कुठे-कुठे कार्यक्रम सादर करणार याचा 'मुंटा'नं हा घेतलेला आढावा...
००००
अकरा ठिकाणी घुमणार आवाज
'सा रे ग म प'च्या तेराव्या पर्वाचा विजेता असलेल्या नचिकेत लेलेचे दिवाळीत तब्बल अकरा कार्यक्रम होणार आहेत. ठाणे, विलेपार्ले, दादर, प्रभादेवी, रोहा, अलिबाग, गोवा, गोरेगाव, बोरिवली अशा अनेक ठिकाणी नचिकेत गाताना दिसणार आहे. सध्या गाजत असलेल्या 'संगीत चि.सौ.कां. रंगभूमी' या नाटकातही तो काम करतोय.
कार्यक्रम अन् शॉर्टफिल्म्स
संगीत सम्राटमधून घराघरात पोहोचलेला अभिषेक नलावडे यंदाच्या दिवाळीत डोंबिवलीतील फडके रोड येथे आपली कला सादर करणार आहे. अनेक गाण्यांसोबत त्याने जिंगल्स आणि शॉर्टफिल्म्ससाठी पण रेकॉर्डिंग केलं आहे.
जव्हारमध्ये होणार कार्यक्रम
गेली सतरा वर्षं संगीत शिकणारी तन्वी गोरे सध्या 'संगीत हाच मुलाचा बाप' या नाटकात प्रेक्षकांना दिसतेय. नाट्यगीतांबरोबरच भावगीत आणि भक्तीगीतसुद्धा तितक्याच ताकदीनं ती सादर करते. दिवाळीत जव्हार-वाडा या ठिकाणी ती आपली कला सादर करणार आहे.
पाच कार्यक्रमांची रम्य पहाट
शास्त्रीय आणि नाट्यसंगीताचा प्रसार होण्यासाठी ओंकार प्रभुघाटे विविध कार्यक्रमांचं आयोजन करत असतो. या दिवाळीला दादर, मुलुंड, गिरगाव, वसई आणि ठाण्यामध्ये ओंकारचे पाच कार्यक्रम आहेत.
बासरीवादनाची पर्वणी
इचलकरंजीहून मुंबईत आलेल्या प्रणव हरिदासनं तरुण संगीतकार म्हणून वेगळं स्थान निर्माण केलं आहे. प्रणवनं आतापर्यंत साठ गाणी संगीतबद्ध केली आहेत. प्रणव एक उत्तम बासरी आणि पियानिका वादक असून त्याचे युट्यूब चॅनेलदेखील आहे. दिवाळीनिमित्त अलिबाग, रोहा, पुणे, बोरिवली, पालघर, ठाणे या ठिकाणी विविध नऊ कार्यक्रमांमध्ये तो आपली कला सादर करणार आहे.
तबल्याची करणार साथ
गेली बारा वर्षं स्नेहलकुमार धामापुरकर यांच्याकडे तबला शिकत असलेला गणराज वैद्य २०१७-१८ साली संगीत विशारद झाला आहे. हिंदुस्थानी शास्त्रीय संगीत, सुगम संगीत, नाट्यसंगीत, गझल, किर्तन, भजन यासाठी तो तबल्याची साथ करतो तसंच कथक नृत्याबरोबरही साथसंगत करतो. यंदा कल्याणमध्ये दिवाळी पहाटच्या कार्यक्रमात तो तबल्याची साथ करणार आहे.
संगीताची आवड
पालघरला राहणारी मधुरा जोशी गेली अनेक वर्षं संगीताचं शिक्षण घेत आहे. बीएच्या अभ्यासाबरोबरच ती संगीताची आवड मनापासून जोपासते. 'दिवाळी पहाट'सारखाच सांज दिवाळी या कार्यक्रमामध्ये ती सहभाग घेणार आहे.
'जोडी तुझी-माझी'ची उत्सुकता
विकास भाटीवडेकर यांच्याकडे संगीताचं शिक्षण घेणारी अद्विता लोणकर वयाच्या सहाव्या वर्षापासून संगीताचं शिक्षण घेत आहे. 'सा रे ग म प लिटील चॅम्प्स' या प्रख्यात संगीत स्पर्धेच्या अंतिम फेरीमध्ये तिचा समावेश होता. शिवाजी मंदिर येथे होणाऱ्या 'जोडी तुझी-माझी' या दिवाळी पहाट कार्यक्रमात ती सहभाग घेणार आहे.
गिरगावची पहाट गाजवणार
'व्हॉट्स युवर फर्माईश' या फेसबुक पेजच्या माध्यमातून मैथिली आपटेनं आपला संगीताचा प्रवास सुरू केला. गेली पाच-सहा वर्षं ती संगीताचं शिक्षण घेत आहे. यंदाच्या दिवाळीत गिरगावमधील दिवाळी पहाटेच्या कार्यक्रमात ती सादरीकरण करणार आहे.
संकलन- संपदा जोशी, देविका जोशी, मेघना अभ्यंकर