ओढ लागते मातृभूमीची!

शिक्षणाच्या निमित्तानं परदेश गाठलेल्या विद्यार्थ्यांना सतत मातृभूमीची आठवण येत असते. तिथे राहताना भारताविषयी काय भावना मनात दाटून येतात त्या त्यांनी विदेशातून खास ‘मटा’शी शेअर केल्या आहेत…

संस्कृतीची आठवण
जर्मनीत राहत असलेल्या आम्हाला देशाची ओढ कायम लागलेली असते. ‘अतिथी देवो भव’ ही भारताची संस्कृती आहे. आपल्या देशाबद्दल भारतीयांना वाटणारं प्रेम, सांस्कृतिक वातावरण हे कुठेही पाहायला मिळत नाही. आपल्याकडे कुणी कुणालाही मदत करायला नेहमी तत्पर असतं. तसं बाहेरच्या देशात नसतं. जेव्हा आम्ही परदेशात असतो तेव्हा आम्हाला भारत संस्कृती, कला, उद्योग अशा विविधतेने नटलेला दिसतो. ‘जन गण मन…’चे स्वर कानांवर पडले की आपोआपच मनात अभिमान दाटून येतो.
समांथा कोठारे (विद्यार्थी, जर्मनी)

अभिमान वाटतो
इंग्लंडला आल्यावर हे प्रकर्षानं जाणवलं की भारतात अनेक चांगल्या गोष्टी अनुभवायला मिळतात ज्या इतर कुठल्याही देशात मिळत नाहीत. भारताची अर्थव्यवस्था चांगल्या प्रकारे प्रगती करतेय. तेव्हा भारत लवकरच आर्थिक क्षेत्रात आघाडीवर येईल. 'डिजिटल इंडिया'सारख्या संकल्पना आकाराला येतायत याचा अभिमान वाटतो. स्वातंत्र्य मिळून इतकी वर्ष झाली तरी अजूनही काही गोष्टी सुधारण्याची गरज आहे. त्याची जाणीव परदेशात राहिल्यावर अधिक होते. तरुण पिढीच हे चांगले बदल घडवून आणेल.
ऋषभ तपस्वी (विद्यार्थी, इंग्लंड)

विरह जाणवतो
खरं तर परदेशात जाण्याचा माझा हा पहिलाच प्रसंग. इथे येऊन थोडे दिवसच झाले असल्यानं मातृभूमीचा विरह अणि ओढ प्रचंड जाणवते आहे. स्वातंत्र्यदिनी तर ही आठवण जास्तच येते. अमेरिकेमध्ये राहत असल्याने इकडचा जोशात होणार स्वातंत्र्यदिन बघताना, आपल्या स्वातंत्र्यदिनाची आठवण येते. ‘भारतमाता की…’ असं म्हटल्यावर ‘जय’ अशी जोरदार घोषणा कानात घुमतेय.
कौशल रेडे (विद्यार्थी, अमेरिका)

शब्दांकन : प्रांजली शेणॉय, सस्मित फेगडे, नेहा कदम. (कॉलेज क्लब रिपोर्टर)