नवरात्रौत्सवात मंदीची ‘गिरकी’

तरुण-तरुणींच्या लाडक्या नवरात्रौत्सवावर यंदा मंदीचं सावट पाहायला मिळतंय. प्रायोजकांकडून हात आखडता घेण्यात आल्यानं गरब्याची तिकीट, पासच्या दरात २० टक्क्यांनी वाढ होणार आहे.

अजय उभारे, रुची मणचेकर

देशभर जाणवणाऱ्या मंदीचा तडाखा या वर्षी नवरात्रौत्सवालाही बसणार असल्याची चिन्हं आहेत. गरबा-दांडियाचे मुख्य प्रायोजक असणाऱ्या रिअल इस्टेट आणि दागिने निर्मिती क्षेत्राचा कारभार थंडावल्यानं त्यांचा उत्सवातला सहभाग कमी झाल्याचं दिसून येतंय. त्यामुळे एकूणच निरुत्साहाचं वातावरण आहे. तरीही, दुसरीकडे तरुण-तरुणींनी नवरात्रीची तयारी जोरात सुरू केली आहे.

मुंबईतल्या प्रमुख गरबा महोत्सवाच्या आयोजकांनी पास आणि तिकिट दरात २० टक्क्यांनी वाढ करण्याचा निर्णय घेतला आहे. आयोजकांच्या म्हणण्यानुसार, इव्हेंटसाठी लागणारा ६० टक्के भाग प्रायोजकांकडून येतो. त्यामुळे उर्वरित ३० टक्के खर्च तिकीटविक्री आणि १० टक्के खर्च खाद्यपदार्थ-पेयविक्रीतून वसूल करणं कठीण असतं असं आयोजक सांगतात. प्रायोजकांकडूनही थंड प्रतिसाद आहे. आयोजकांच्या मते, सुमारे ५० टक्के खर्च सजावटीवर, २५ टक्के कलाकारांवर, इतर भाग सुरक्षाव्यवस्थेवर खर्च होतो. त्यामुळे यावर्षी आयोजकांनी तिकीट दरात वाढ करण्याचा निर्णय घेतला आहे.

आर्थिक मंदीमुळे काही प्रमाणात बाजारात निरुत्साहाचं वातावरण असलं, तरी दुसऱ्या बाजूला गरबावेड्यांची मात्र गेल्या काही दिवसांत लगबग सुरू झाली आहे. नवरात्रीतला आपला फॅशन लूक ठरवण्यापासून ते नामांकित गरबा ठिकाणांची तिकीटं मिळवण्यापर्यंत धडपड सुरू झालेली पाहायला मिळते.

'सायलेंट' गरब्याला बाय-बाय

डीजे, ढोल यांच्या आवाजामुळे नागरिकांना होणारा त्रास आणि ध्वनिप्रदूषण यामुळे गेल्या काही वर्षांत सायलेंट गरबा साजरा होऊ लागला होता. त्यासाठी हेडफोन्सचा वापर करून दांडिया खेळला जात होता. या हट के संकल्पनेचं त्यावेळी अनेकांनी स्वागत केलं होतं. परंतु, त्यासाठी लागणारा खर्च आणि आर्थिक मंदीमुळे प्रायोजकांनी उत्सवाकडे फिरवलेली पाठ यामुळे अनेक 'सायलेंट गरबा' आयोजकांनी या संकल्पनेला बाय-बाय करायचं ठरवलं आहे.

आयोजकांच्या अडचणी

नवरात्रौत्सवाला गेल्या काही वर्षांत इव्हेंटचं स्वरूप आलं आहे. तरुणांमध्ये चर्चेत असलेल्या या इव्हेंट्सच्या आयोजनात मात्र खूप अडचणी येत असल्याचं सांगितलं जातंय. तिकीटांची वाढत चाललेली रक्कम, वेळेवर आणि आवाजावर लादण्यात येणारी बंधनं, इव्हेंटचं आयोजन करण्याअगोदर लागणाऱ्या परवानग्या या अडचणींना आयोजकांना सामोरं जावं लागत आहे.

इंडो-वेस्टर्न लूक

गरब्याला या वर्षी काय नवीन घालावं हा प्रश्न तरुणांसमोर असतो. चनियाचोळी या पारंपरिक पेहरावाचे बदलते इंडो-वेस्टर्न लूक हल्ली पाहायला मिळतात. तर यात जीन्स, जॅकेट, ऑक्सिदाईज्ड दागिने यांचा यात हमखास समावेश असतो. सुंदर, अनोखा आणि अगदी कॅज्युअल असा हा लुक तरुणांना आवडताना दिसतोय.