शिवरायांचं साकारावं रुप

अजय उभारे, कॉलेज क्लब रिपोर्टर

मूड इंडिगोमध्ये चेतन राऊत या हरहुन्नरी कलाकारानं साकारलेल्या मोदींच्या भव्य पोट्रेटची दखल गिनीज बुकनंही घेतली. आता महाराष्ट्राचं आराध्यदैवत असलेल्या शिवरायांना मानवंदना देण्यासाठी त्यांचं त्यापेक्षाही भव्य पोट्रेट तो साकारणार आहे चक्क सीडींचा वापर करून. शिवाजी महाराजांचं हे जगातलं मोठं पोट्रेट असेल. यंदाच्या महाराष्ट्र दिनी ते साकारलं जाणार आहे…

मूड इंडिगो या फेस्टिव्हलमध्ये कॅसेट्सचा वापर करून चेतन राऊत या तरुण कलाकारानं नरेंद्र मोदी यांची भव्य कलाकृती साकारली. त्याच्या या कलाकृतीची लिम्का बुकमध्ये नोंद झाली. ‘गिनीज बुक ऑफ वर्ल्ड रेकॉर्ड’नंही चेतनच्या कलेची दखल घेतली असून, तिथे त्याची नोंद होण्याच्या प्रतीक्षेत तो आहे. त्यानंतर, संपूर्ण जगासाठी आदर्शवत ठरलेल्या शिवरायांना अनोखी मानवंदना देण्यासाठी तो सज्ज झाला आहे. महाराष्ट्र दिनाच्या निमित्तानं तो शिवाजी महाजांचं एक भव्य पोट्रेट तो वरळीत साकारणार आहे.

मुंबईतल्या चोरबाजार, मुंब्रा, लॅमिंग्टन रोड या ठिकाणच्या जुन्या सीडी विक्रेत्यांशी संपर्क साधून त्याने हजारो सीडीज मिळवल्या. पिक्सेल आणि थ्रीडी पेंटिंग यांचं फ्युजन असणारं शिवरायांचं मोझॅक आर्ट या सीडीजच्या माध्यमातून चेतन साकारणार आहे. चेतनच्या प्रयत्नांमुळे आधी कॅसेट्स आणि आता सीडीज यासारख्या टाकाऊ गोष्टी वापरून अशा प्रकारची कलाकृती सादर करणारा भारत हा पहिलाच देश ठरला आहे. गेल्या चार-पाच महिन्यांपासून चेतननं ७५ हजारपेक्षा जास्त सीडीज गोळा केल्या आहेत.

मोदींच्या पोट्रेटपेक्षा शिवरायांचं हे पोट्रेट अधिक मोठं असेल. ११० फुट x ९० फुट या भव्य आकाराचं हे जगातलं सर्वात मोठं पोट्रेट असेल. सीडीज गोळा केल्यानंतर त्यांना चित्रानुसार कोडिंग करणं आणि इतर कामांत पाच-सहा दिवसांचा वेळ लागतो. तर सीडी जमिनीवर पसरवून पोट्रेट साकारण्यास चोवीस तासांहून अधिक वेळ लागतो असं चेतननं सांगितलं. हे प्रदर्शन पूर्ण झाल्यावर सगळ्या सीडी त्याच्या पुढील विश्वविक्रमासाठी दुसऱ्या महापुरुषाच्या पोट्रेटकरता वापरण्यात येतील असंही त्याने सांगितले.

प्रदर्शन कधी आणि कुठे?

विक्रोळीच्या धर्मवीर छत्रपती संभाजी मैदानात १ ते ३ मे या कालावधीत हे प्रदर्शन सगळ्यांसाठी विनामूलय संपूर्ण दिवस खुलं असेल. ३० एप्रिलच्या मध्यरात्रीपासून हे प्रदर्शन पोट्रेटचं काम सुरू असतानाही पाहता येणार आहे.

कोण आहे चेतन राऊत?

ठाण्यातल्या वाडा इथल्या एका आदिवासी पाड्यात राहणाऱ्या चेतनने मुंबईच्या जे जे स्कूल ऑफ आर्टमधून फाईन आर्टस् या विषयात पदवी संपादन केली. प्रिंट मेकिंग या विषयात राष्ट्रीय पुरस्कार मिळवून त्यानं मोठ्या कष्टानं पदव्युत्तर शिक्षण पूर्ण केलं. शेतकरी कुटुंबातल्या असलेल्या चेतनच्या घरच्या परिस्थितीमुळे त्याचे इंजिनीअर बनण्याचं स्वप्न अपूर्णच राहिलं. क्रिकेटची आवड असणाऱ्या चेतननं संतोष साळवी यांच्या सांगण्यावरून ‘जेजे’मध्ये प्रवेश घेतला.