लग्नाला टॅटूचं विघ्न

एखाद्याच्या लग्नात मंगळ आडवा येतो हे तुम्ही ऐकलं असेल. पण, जर तुम्ही अंगावर टॅटू काढला असेल, तर तोही तुमच्या लग्नात आडवा येऊ शकतो हे माहितीय का? होय, हौसेनं काढलेला टॅटू अनेकांच्या लग्नात अडथळा आणू लागलाय.

महाराष्ट्र टाइम्स.कॉम

शब्दुली कुलकर्णी

हौसेखातर तुम्ही अंगावर एखादा टॅटू काढून घेता. त्या टॅटूची मित्र-मैत्रिणींकडून तारीफ होते. पण, हाच टॅटू तुमच्या शुभ मंगल ठरण्यात आडवा येऊ शकतो. राहू, केतू, शनी, मंगळ यांच्याबरोबरच हा टॅटूही तुमच्या लग्नात अडथळा ठरू शकतो. अंगावर टॅटू आहे म्हणून स्थळ नाकारण्याचे अनेक प्रकार होताना दिसताहेत अशी माहिती विवाह जमवणाऱ्या संस्थांकडून मिळते. यात मुली किंवा मुलं असा कोणताही फरक नाही. खास करून त्यांच्या पालकांना अंगावर टॅटू असणं आवडत नाही असं निरीक्षण त्यांनी मांडलं आहे.

आपल्या आवडीनिवडी किंवा भविष्यातलं एखाद्या ध्येयाविषयी सांगणारा टॅटू अंगावर गोंदवून घेण्याची फॅशन आहे. कधी शरीराच्या दर्शनी भागात छोटासा तर कधी संपूर्ण हात किंवा पाय भरुन टॅटू काढले जातात. एवढंच नव्हे तर टॅटूतले वेगवेगळे प्रकारही आजमावले जातात. निऑन रंगात किंवा एका रंगाचा टॅटू असे प्रयोगही करून पाहिले जातात. तरुणांसाठी आवडते असलेले हे टॅटू लग्न जमवताना मात्र नावडते ठरत असल्याचा अनुभव टॅटू काढून घेणाऱ्यांना येतोय.

तरुणांमध्ये एखादा प्रतीकात्मक टॅटू काढून घेण्याची क्रेझ पाहायला मिळते. आवडत असलेला एखादा बँड, ते पाठिंबा देत असलेल्या फूटबॉलच्या टीमचा लोगो किंवा ते संलग्न असलेल्या संस्थेसंदर्भातले टॅटू काढले जातात. यामुळे असे तरुण कोणत्याही चुकीच्या संस्थेशी संलग्न नाहीत ना अशी भीती पालकांच्या मनात असते. त्यामुळे अशा स्थळांना प्रामुख्यानं नकार दिला जातो किंवा त्या टॅटूविषयी चौकशी केली जाते. यामागे पूर्वग्रह आणि त्याकडे पाहण्याचा विशिष्ट दृष्टिकोन कारणीभूत असल्याचं तज्ज्ञ सांगतात. हे फक्त मुलांच्या बाबतीतच होतं असं नाही. मुलींच्या शरीरावर काढलेल्या टॅटूंच्या बाबतीतही असाच विचार केला जातो. किंबहुना आपल्याकडच्या मानसिकतेमुळे मुलीच्या शरीरावरील टॅटूविषयी अधिक चौकशी केली जाते. विशेषत: परदेशात स्थायिक असलेल्या भारतीय तरुणांच्या बाबतीत विशेष खबरदारी घेतली जाते.


पिअर्सिंगवरही नजर
भुवया, हनुवटी किंवा बेंबीवर पिअर्सिंग, म्हणजेच टोचून घेतलं जातं. एवढंच नव्हे, तर टॅटू अधिक आकर्षक वाटावा म्हणून त्यावरही पिअर्सिंग केलं जातं. या पिअर्सिंगबाबतही टॅटूसारखेच काही पालकांचे पूर्वग्रह असतात. त्यामुळे कानाशिवाय इतर ठिकाणी पिअर्सिंग केलेलं असल्यास त्या स्थळाबाबत फेरविचार केला जातो.


टॅटू किंवा पिअर्सिंग असलेल्या स्थळांना नकार देण्यामागे काही पूर्वग्रह आणि त्याच्याकडे बघण्याचा विशिष्ट दृष्टिकोन कारणीभूत असतो. टॅटूच्या बाबतीत काही जणांची मतं ठरलेली असतात. विशेषत: ज्येष्ठांच्या पिढीची मानसिकता बदलणं शक्य नसतं. त्यामुळे टॅटू असलेल्या स्थळांना नकार देण्याचं प्रमाण वाढतंय.
गौरी कानिटकर, मॅरेज काऊन्सेलर