भारतातील हॅलोवीन पार्ट्यांमध्ये टॅटूंचा ट्रेंड

समोरच्याला घाबरवून टाकणारी वेशभूषा करुन हॅलोवीन पार्ट्यांना हजेरी लावणाऱ्यांचं प्रमाण आपल्याकडेही वाढलं आहे. यंदा त्यात टॅटूच्या ट्रेंडची भर पडलीय. हॅलोवीनच्या काळात कोणत्या प्रकारच्या टॅटू डिझाइन्सना अधिक मागणी आहे? त्यात काय वेगळपण आणलं जातंय?

शब्दुली कुलकर्णी

पाश्चात्य देशात साजरा होणारा हॅलोवीन आपल्या देशातही साजरा करण्याचं प्रमाण हल्ली वाढलं आहे. विविध प्रकारच्या पार्ट्यांचं आयोजन करुन आणि दरवर्षी नवीन ट्रेंड फॉलो करुन मोठ्या जल्लोषात तो साजरा केला जातो. आठवडाभर चालणाऱ्या सेलिब्रेशनमध्ये ३१ ऑक्टोबर हा दिवस महत्त्वाचा असतो. यंदा हॅलोवीननिमित्त आपल्याकडेही अंगावर टॅटू काढून घेण्याचं प्रमाण वाढल्याचं दिसून येतंय.

काही वर्षांपूर्वी हॅलोवीननिमित्त एक-दोन पार्ट्यांचं आयोजन व्हायचं. पण हॅलोवीनचं सेलिब्रेशन यंदा मात्र आठवडाभर होताना दिसतंय. यासाठी खास कायस्वरुपी टॅटू काढून घेण्यासाठी स्टुडिओमध्ये गर्दी केली जात आहे. अनेक ठिकाणी पार्टीमध्ये तात्पुरत्या स्वरुपाचे टॅटू काढून घेण्याचे स्टॉल ठेवले जात आहेत. या टॅटूंमध्ये प्रामुख्याने काळी मांजर, चेटकीण, झोंबी, वटवाघूळ, डेव्हील आणि क्लाऊनच्या आकाराचे टॅटू प्रामुख्यानं डिझाइन करुन घेतले जातात. या डिझाइनमध्ये वेगळेपणा आणण्यासाठी निऑनचे रंग किंवा रेडियमचाही वापर केला जातो. हल्ली कॉर्पोरेट कंपन्यांमध्ये खास हॅलोवीन पार्ट्यांचं आयोजन केलं जातं. त्यातही प्रामुख्याने टॅटूचे स्टॉल्स असतात.

आपल्याकडे पाश्चिमात्य संस्कृतीचं अनुकरण करण्याचं प्रमाण वाढलं आहे. हॅलोवीननिमित्त टॅटू काढून घेण्याचा ट्रेंड हा या अनुकरणाचाच एक भाग आहे. तेच-तेच साचेबद्ध टॅटू काढण्यापेक्षा नवनवीन डिझाइन्सची मागणी होत आहे. - लवेश वैद्य, टॅटू आर्टिस्ट

हॅलोवीन म्हणजे काय?

निधन झालेल्या लोकांच्या स्मरणार्थ पाश्चात्य देशांमध्ये ३१ ऑक्टोबरला हॅलोवीन साजरा केला जातो. सुरुवातीला तीन दिवसांपुरतं हे सेलिब्रेशन मर्यादित होतं. पण, आता आठवडाभर हॅलोवीन साजरा केला जातो. या काळात मांसाहारी जेवण टाळून सफरचंद आणि बटाट्यापासून बनवलेले पॅन केक खाण्यावर भर दिला जातो. तसंच भोपळ्याला भीतीदायक आकार देऊन ते अंगणात लावले जातात. सोशल मीडियामुळे हॅलोवीन जगाच्या कानाकोपऱ्यापर्यंत पोहोचला आहे. भारतातही याचं प्रमाण गेल्या काही वर्षांपासून वाढत आहे.

कसं असतं सेलिब्रेशन?

परदेशात 'ट्रिक ऑर ट्रिट' हा गेम खेळून हॅलोवीन साजरा केला जातो. यामध्ये लहानगी मंडळी भीतीदायक पेहराव करुन शेजाऱ्यांकडे ट्रिट, म्हणजेच खाऊ मागायला जातात. खाऊ दिला नाही, तर ट्रिक अंतर्गत शेजाऱ्यांसोबत भीतीदायक प्रँक खेळले जातात. ट्रिटमध्ये सर्वसाधारणपणे चॉकलेट किंवा केक हा खाऊ दिला जातो. याशिवाय हॅलोवीन पार्टी, शेकोटी पेटवून धमाल खेळ खेळणं, भीतीदायक ठिकाणांना भेट देणं किंवा एकमेकांना घाबरवणाऱ्या गोष्टी-किस्से सांगणं, अशा प्रकारे हॅलोवीन साजरा केला जातो.