अनंत चतुर्दशीला गिरगाव चौपाटीवर एमटीडीसीतर्फे परदेशी पर्यटकांसाठी खास व्यवस्था करण्यात आली होती. या परदेशी पाहुण्यांना मराठमोळे फेटे बांधण्याचं काम करत होता तो श्रीधर गुरव हा तरुण. श्रीधर त्यासाठी खास कऱ्हाडहून आला होता. त्याच्या हातून फेटे बांधल्यानंतर या पाहुण्यांचं स्वागत केलं जात होतं. आपली संस्कृती जास्तीत जास्त लोकांपर्यंत पोहोचावी या उद्देशानं श्रीधर वयाच्या तेराव्या वर्षांपासून हे काम श्रीधर करतोय. महाराष्ट्रातल्या काही ठिकाणांबरोबरच आणखी पाच ते सहा राज्यांमध्ये जाऊन त्यानं आजवर लोकांना फेटे बांधले आहेत. 'आपली संस्कृती, सण या गोष्टी अनुभवण्यासाठी परदेशी पर्यटक वेळ आणि पैसे खर्च करून येतात. त्यांचा चांगल्याप्रकारे पाहुणचार करणं हे आपलं कर्तव्य आहे. यावरुनच आपली चांगली प्रतिमा त्यांच्या मनात तयार होते. फेटा बांधल्यानंतर त्यांना होणारा आनंद खूप समाधान देतो', असं श्रीधर सांगतो. फेटे बांधण्याबरोबर तुतारी वाजवण्यातही तो पटाईत आहे. 'मुंबईतल्या गणेशोत्सवात सहभागी होण्याची माझी इच्छा होती. ती यंदा पूर्ण झाली. या कलेतून परदेशी पर्यटकांना आनंद झाला याचं मला समाधान आहे' अशी भावना श्रीधरने व्यक्त केली.
संकलन - प्रथमेश राणे