पुस्तकांशी ‘डेटिंग’

वेदांगी कणव, कॉलेज क्लब रिपोर्टर

डेटिंग म्हणजे काय हे काही वेगळं सांगण्याची गरज नाही. पण हे डेटिंग जर पुस्तकांसोबत असेल तर? हीच भन्नाट कल्पना सुचली केळकर कॉलेजच्या लक्ष्मी कृष्णन आणि आशय निगडे या दोघांना आणि त्यातून समोर आला ‘द ब्लाइंड बुक डेट’ हा उपक्रम.

डेटिंग म्हणजे काय हे काही वेगळं सांगण्याची गरज नाही. पण हे डेटिंग जर पुस्तकांसोबत असेल तर? हीच भन्नाट कल्पना सुचली केळकर कॉलेजच्या लक्ष्मी कृष्णन आणि आशय निगडे या दोघांना आणि त्यातून समोर आला ‘द ब्लाइंड बुक डेट’ हा उपक्रम. वाचनप्रेमी तरुणाईसाठी हा उपक्रम खास आकर्षण ठरतोय. केवळ ९९ रुपयांत पुस्तक मिळवणं यातून शक्य होणार आहे.

या वर्षी व्हॅलेंटाइन डेला ही संकल्पना त्यांनी लाँच केली होती. या उपक्रमात ठेवण्यात आलेल्या सर्व पुस्तकांना मातकट रंगाच्या कागदाची कव्हर्स घालण्यात आली आहेत. यामुळे हे पुस्तक नेमकं कुठलं आहे ते कळणार नाही. पुस्तकाच्या कव्हरवर दोन-तीन ओळींमध्ये त्याविषयी माहिती देण्यात आली आहे. पुस्तकाचं मुखपृष्ठ पाहायला मिळणार नसल्यानं या उपक्रमाचं नाव ‘द ब्लाइंड बुक डेट’ असं देण्यात आलं आहे. अशाच प्रकारे वाचकांनी पुस्तकांची निवड करायची आहे. ठराविक लेखकांची, ठराविक विषयांवरील पुस्तकंच वाचली न जाता वेगवेगळ्या लेखकांची पुस्तकं, विषयांवरील पुस्तकं लोकांनी वाचावी हा उद्देश यामागे असल्याचं लक्ष्मीने सांगितलं.

सध्या यात फक्त इंग्लिश पुस्तकंच ठेवण्यात आली आहेत. उपक्रमाला चांगला प्रतिसाद मिळत असून, पुढे मराठी, हिंदी पुस्तकंही आम्ही ठेवू असं आशय म्हणाला. या उपक्रमासाठी देणगीस्वरुपात पुस्तकं स्वीकारली जातात. तसंच पुस्तकांचा सेल जिथे सुरू असेल तिथून पुस्तकं आणली जातात. एखाद्यानं ५ पुस्तकं देणगी म्हणून दिली तर त्याला एक पुस्तक मोफत दिलं जातं.

ओपन माइक

‘ओपन माइक’ नावाचा इव्हेंट वाचकांसाठी ठेवण्यात येतो. ज्यात तुम्हाला तुमची कोणतीही कला सादर करायची संधी मिळते. यात सहभागी होण्यासाठी आधी नोंदणी करणं आवश्यक असतं. या इव्हेंटच्या निमित्तानं वाचकांना पुस्तकांपर्यंत आणलं जातं. आत्तापर्यंत असे तीन इव्हेंट्स झाले असून, पहिल्या इव्हेंटला ५०, दुसऱ्या इव्हेंटला ९० तर तिसऱ्या इव्हेंटला १२५ पुस्तकं विकली गेली. येत्या रविवारी ‘द ब्लाइंड बुक डेट’चा चौथा इव्हेंट लोअर परळ इथल्या द व्हाइट ओअल, वन इंडियाबुल्स सेंटर इथे दुपारी ३ ते ६ या वेळेत होणार आहे. यावेळी किमान २०० पुस्तकं ठेवण्यात येतील.