सेल्फी काढताय?

पुणे-मुंबई महामार्गावरील खंडाळा घाटात सेल्फी काढताना पुलावरून पडल्यानं एका तरूणाचा मृत्यू झाला. तर कानपूरमध्ये गंगा नदीत पोहताना सेल्फी काढण्याच्या प्रयत्नात असलेल्या सात विद्यार्थ्यांचा बुडून मृत्यू झाला. एकाच दिवशी घडलेल्या या दोन घटनांमुळे सेल्फीच्या या जीवघेण्या वेडाबद्दल नव्याने चर्चा सुरू झाल्या आहेत. आता पाऊस सुरू झाल्यानं ट्रेक, लाँग ड्राइव्ह, धबधबे, समुद्रकिनारे इथे जाण्याचे प्लॅन्स होतील. अशा ठिकाणी फिरायला गेल्यावर सेल्फी काढताना काय काळजी घ्याल याबाबत काही टिप्स...
> सेल्फी काढण्यासाठी अति साहस दाखवण्याच्या फंदात पडू नका.

> निसरड्या जागीवर उभं राहून फोटो काढणं टाळा.

> धुकं, पाऊस, वारा, पाणी, दरड यासारख्या नैसर्गिक गोष्टींचा अंदाज घेऊनच फोटोग्राफी करा.

> नदी, समुद्र, डोंगरकडा याबरोबरच गाडीच्या खिडकीतून बाहेर डोकावून सेल्फी काढणं टाळा.

> इथून तिथून वाकून उगाच भलतं साहस करण्याऐवजी चांगली सेल्फी स्टीक घ्या.

> रस्त्यांवर मध्येच थांबून फोटोग्राफी करणं टाळा. पावसामुळे रस्त्यावरील दृष्यमानता कमी झालेली असते. त्यामुळे अपघात होण्याची शक्यता असते हे लक्षात ठेवा.

> पिकन‌िकला किंवा ट्रेकला कुठे जात आहात याची घरी कल्पना देऊन ठेवा.

> स्लीपर्स किंवा किटोज वगैरे घालून ट्रेकला जाऊ नका.

> तुमच्यासोबत असलेल्या एखाद-दोन मित्र-मैत्रिणींचे फोन नंबर घरच्या मंडळींना देऊन ठेवा.

> ट्रेकला, जंगलात किंवा डोंगराळ भागात गेल्यास एकट्याने आडवाटेला जाऊ नका.

> पिकनिक स्पॉटच्या जवळचं पोलिस स्टेशन, दवाखान्याचा क्रमांक निघण्याआधीच सेव्ह करून ठेवा

> मित्रांबरोबर नको ती पैज लावून स्वतःचा जीव धोक्यात टाकू नका.

> स्थानिकांच्या तसंच अनुभवी व्यक्तींच्या सल्ल्याकडे दुर्लक्ष करू नका.

> मद्यपान करून ट्रेकिंग, गाडी चालवणं, पोहायला जाणं किंवा बोटींग करू नका.

> पिकनिकच्या ठिकाणी असणाऱ्या सूचनाफलकांचं पालन करा.

> ग्रूपने जात असाल तर प्रथमोपचाराचं साहित्य जवळ ठेवाच.