भेट ग्रेट होण्यासाठी...

मुंबई टाइम्स टीम कॉर्पोरेट जगतात औपचरिकतेला खूप महत्त्व आहे. तुमच्या पेहरावापासून ते तुमच्या वागणूकीपर्यंत सगळ्याचं निरिक्षण केलं जातं. तुम्ही या विश्वात हळूहळू रुळायला लागलात की, बिझनेस मीटींगचा सपाटा सुरु होतो. अशा मीटींगला कोणाला भेटताना कसं वागावं, काय बोलावं अशा गोंधळात तुम्ही असता. अशा कॉर्पोरेट भेटी उत्तम होण्यासाठी काही टिप्स...

वेळेत पोहोचा. इतरांच्या वेळेचा मान ठेवणं हे सर्वात प्रथम मनात बिंबवून घ्या. मीटींगच्या ठिकाणी वेळेवर किंबहुना वेळे आधी पोहोचा. तुमच्यामुळे समोरच्या व्यक्तीचा वेळ वाया जाता कामा नये हे लक्षात ठेवा.

हस्तांदोलनाने सुरुवात करा. एकमेकांना भेटल्यानंतर आणि मीटींग सुरु करण्यापूर्वी हस्तांदोलन करा. यामुळे समोरची व्यक्ती तुमच्याशी मोकळेपणाने संवाद साधू शकते. हस्तांदोलन करताना समोरच्या व्यक्तीचं वय किंवा ती व्यक्ती पुरुष आहे की स्त्री आहे याचा विचार करु नका.

व्यवस्थित बसा. समोरच्या व्यक्तीच्या समोर, त्यांच्या उंचीची तुमची आसनव्यवस्था असू द्या. जेणेकरुन संवाद साधण्यास सुलभ ठरेल.

पेहराव महत्त्वाचा उत्तम पेहरावामुळे आत्मविश्वास वाढतो हे खरंच आहे. त्यामुळे मीटींगला जाताना तुम्हाला योग्य वाटेल असा पण नियमांमध्ये बसणारा पेहराव करायला हकरत नाही.

अजेंडा निश्चित करा. मीटींगचा विषय आणि मांडायचे मुद्दे याचा अजेंडा तयार करा. विचारायच्या आणि उत्तर द्यायच्या प्रश्नांच्या तयारीनिशी मीटींगला सुरुवात करा.

मोबाइल दूर ठेवा. मीटींग चालू असताना मोबाइल स्वत:पासून दूर ठेवा. त्यामुळे तुमचं लक्ष विचलित होणार नाही. तातडीने एखादा फोन किंवा मेसेज करायचा असल्यास मीटींग रुमच्या बाहेर येऊन करा.