अॅप विनयेन शोभते!

>> दीपाली सकपाळ, कॉलेज क्लब रिपोर्टर

तरुणाईला सतत नवं काहीतरी करायचा ध्यास असतो. त्यातही थोडं सामजिक भान असेल तर तळागाळातल्या लोकांना यूथने केलेल्या कामाचा फायदा होऊ शकतो. विनय साळुंखे यानेही असंच एक अॅप बनवलंय.

'अविष्कार’ ही इंटर युनिव्हर्सिटी रिसर्चॣ कन्व्हेन्शन स्पर्धा नुकतीच भानुबेन नानावटी फार्मसी कॉलेजमध्ये पार पडली. या स्पर्धेत बॉम्बे कॉलेज ऑफ फार्मसीचा विद्यार्थी विनय साळुंखे याने बाजी मारली. या स्पर्धेत विनयने स्वतः बनवलेल्या 'हेल्थ हमेशा' या अँप्लिकेशनच पोस्टर सादर केलं. आताच्या धावपळीच्या काळात स्वतःच्या आरोग्याकडे दुर्लक्ष होत आणि मग अनेक दुर्गम आजार माणसाला जडतात. अनेक आजारांची सर्व माहिती असलेले हे अँप लहान थोरांनसोबत सर्वांच्या उपयोगी पडणार आहे.

या अॅपची खासियत म्हणजे यावरची माहीती आपल्या मातृभाषेत उपलब्ध होऊ शकते. मराठी, बंगाली, पंजाबी, तेलगू, गुजराती अशा अनेक भाषांत माहिती मिळाल्याने अनेक लोकांना या अॅपचा फायदा होऊ शकतो.

एखाद्या आजाराची लक्षणं, त्यावर घरगुती उपचार ,औषधे याची माहिती आपल्याला या अॅपवर मिळू शकते. विनयने खूप संशोधन करून हे अॅप तयार केलं आहे. आपल्या देशात सर्वांना आजाराविषयी माहिती सहजरित्या उपलब्ध व्हावी आणि आरोग्याविषयी अजून जनजागृती होण्यासाठी आपण हे अॅप बनवलं आहे असं विनय सांगतो.

नवजात बालकाच्या जन्म तारखेनुसार वेळोवेळी लसीकरणाची माहिती तसेच आपत्कालीन परिस्थितीत जवळ असलेल्या उपचार केंद्राची माहिती हे अॅप देऊ शकेल. अशा अनेक सुधारणा होऊन हे अॅप लवकरच गुगल प्ले स्टोअरवर विनामूल्य उपलब्ध होणार आहे. पुढील महिन्यात होणाऱ्या राज्यस्तरीय स्पर्धेत विनय मुंबई विद्यापीठाचं प्रतिनिधित्व करेल.