व्हायरल जोक्स वाढवतंय टेंशन!

परीक्षा म्हटलं की धाकधूक आणि टेन्शन हे ठरलेलं समीकरण. पण हे वातावरण परीक्षेनंतर विद्यार्थ्यांना जाणवू लागलंय. का? तर व्हॉट्सअॅप, फेसबूकवरचे जोक्स. नुकताच बारावीचा निकाल लागलाय. त्यामुळे सोशल मीडियावर पास आणि नापास अशा दोन्ही गोष्टींवरच्या विनोदांनी धुमाकूळ घातलाय. याचा विद्यार्थ्यांवर काय परिणाम होतोय हे जाणून घेण्यासाठी वाचा...
संपदा जोशी, कॉलेज क्लब रिपोर्टर
muntainbox@gmail.com
'मला फक्त ६० टक्के मिळाले.. आता हे ग्रुपवर कसं सांगू?'
'अरे यार.. गणितात १ गुणाने नापास झालो.. हे मित्रांना समजलं तर जोक्स पाठवून माझ्यावर हसतील' हल्ली असले संवाद ऐकायला मिळणं कॉमन झालंय. आजच्या डिजिटल जगात निकालासंबंधीचे 'व्हायरल जोक्स' सध्या धिंगाणा घालत आहेत. परीक्षेच्या निकालाच्या आधी आणि नंतर सोशल मीडियावर विनोदांचा पूर आलेला दिसतोय. मात्र या जोक्समुळे काही विद्यार्थ्यांच्या मनावर मात्र परिणाम होऊ शकतो हे लक्षात घयायला हवं.
निकाल लागल्यानंतरही काही विद्यार्थ्यांची मनस्थिती ठीक नसते. काहींना त्यांच्या मनासारखे गुण मिळालेले नसतात तर काही नापास झालेले असतात. अशावेळेस सोशल मीडियावरचे हे विनोद वाचून विद्यार्थ्यांना आणि त्यांच्या पालकांनाही टेन्शन येऊ शकतं. 'कमी गुण मिळाले किंवा नापस झालो, हे नातेवाईकांना आणि मित्र-मैत्रिणींना समजल्यावर ते काय म्हणतील?' हा विचार त्यांच्या मनात येतो. त्यामुळे मजा म्हणून व्हायरल झालेले जोक्स सगळ्यांनाच हसण्याचा आनंद देतील असं नाही. कदाचित हेच जोक्स एखाद्या विद्यार्थ्याला चुकीचं पाऊल उचलायला प्रवृत्त करू शकतात. निकालासंबंधी जोक्स शेअर करताना त्याचा नेमका कसा परिणाम होईल याचा तो फॉरवर्ड करताना भान बाळगायला हवं. हा विचार जर प्रत्येकाने केला तर कदाचित विद्यार्थ्यांच्या मनावर चुकीचा परिणाम होणार नाही.
मनावर चुकीचा परिणाम
या जोक्सचा कमी गुण मिळालेल्या विद्यार्थ्यांच्या मनावर सहाजिकच परिणाम होतो. अशा मेसेजेसचा अतिरेक झाला तर मुलं त्याचा चुकीचा अर्थ काढू शकतात. त्यामुळे हे विनोद इतर ग्रुप्समध्ये फॉरवर्ड करताना विचार केला पाहिजे.
- प्राची कुलकर्णी, मानसोपचारतज्ज्ञ

व्हायरल झालेले काही जोक्स..

१२ वी पास विद्यार्थ्यांना डॉक्टर/वकिल/सीए होण्यासाठी शुभेच्छा......
नापास विद्यार्थ्यांना सरपंच/नगरसेवक/आमदार/खासदार/ मुख्यमंत्री होण्यासाठी शुभेच्छा..


शेजारी : किती टक्के मिळाले रे तुला ?.
....
विद्यार्थी : (नाना पाटेकर स्टाईलमध्ये) लो ....आ गये मेरी मौत का तमाशा देखने


वडील: उद्या निकाल आहे ना रे?
मुलगा: हो...
वडील: जर का नापास झालास, तर तुझा माझा संबंध संपला.
दुसऱ्या दिवशी
वडील: काय रे, किती टक्के?
मुलगा: तू कोण रे मला विचारणारा?