इच्छापूर्ती करणारं 'विशबेरी'

संशोधन, मनोरंजन, संरक्षण, आरोग्य अशा विविध क्षेत्रांत महिला आघाडीवर आहेत. कित्येक उद्योगक्षेत्रातील मोठ्मोठ्या पदांवर आज कर्तुत्वान महिला कार्यरत आहेत. असं असताना स्टार्टअप, आन्त्रेप्रिनरशीपमध्ये तरी महिला मागे कशा राहतील? तर प्रियांका अगरवाल आणि अंशुलिका दुबे या तरुण उद्योजिका या प्रश्नाचं चोख उत्तर आहेत. नामांकीत कंपन्यातील नोकऱ्या सोडून या दोघींनी स्वतंत्र उद्योग सुरु करण्याकडे मोर्चा वळवला आणि आज एक यशस्वी, लोकप्रिय 'विशबेरी' हे स्टार्टअप त्यांनी सुरू केलं. या विशबेरीनं आजवर अनेकांची स्वप्नपूर्ती केलीये. विशबेरी हे एक ऑनलाईन निधी मिळवून देण्याचं व्यासपीठ असून यावर आर्ट्स, फिल्म, म्युझिक, गेमिंग, टेक्नॉलॉजी, पब्लिशिंग आणि अॅप्स या क्षेत्रांतील नवनवीन कल्पना आणि प्रकल्पांना इतरांसमोर मांडून निधी मिळवता येतो.

'गो फंड युअरसेल्फ' अशी टॅगलाईन असलेल्या विशबेरीने विविध प्रोजेक्ट्ससाठी ६० देशांतील ११,६७४ बॅकर्सकडून ६.६ कोटी रुपये उभे केलेत. एखादी शॉर्टफिल्म, नाटक किंवा टेक्निकल प्रोजेक्ट कितीही चांगला आणि उपयोगी असलातरी पैशांअभावी त्याला मूर्तस्वरूप येत नाही. प्रियांका आणि अंशुलिकाने यावर तोडगा काढण्याचं ठरवलं आणि विशबेरीची स्थापना केली. अल्पशा कालावधीत त्यांच्या या उपक्रमाला लोकांकडून चांगला प्रतिसाद मिळू लागला. शंकर महादेवन, विशाल ददलानी, विशाल गोंदल या सेलिब्रेटींनीही विशबेरीवरून गरजूंना मदत केली आहे. 'सर्जनशीलता आणि नाविन्यता असणाऱ्या प्रकल्पांना, कल्पनांना व्यासपीठ संपूर्ण जगाला देणं, हे विशबेरीचं ध्येय आहे', असं विशबेरीची सह-संस्थापक आणि सीओओ अंशुलिका दुबे सांगते.