पंछी बनू...

‘पिंक’ सिनेमानं प्रेक्षकांच्या मनात घर केलंय. यावरून प्रत्येक कट्ट्यावर चर्चाही घडताहेत. यात आणखी एका कारणामुळे या सिनेमाचं नाव तरुणाईच्या ओठावर आहे. हे कारण आहे, सिनेमात मीनलची भूमिका केलेल्या तापसी पन्नूच्या कॉलर बोनवरील टॅटू. तिच्या कॉलर बोनवर भरारी घेणाऱ्या पक्ष्याचा टॅटू तिचं सिनेमातलं व्यक्तिमत्त्व अधोरेखित करत असल्यानं अनेक मुली अशाप्रकारचा टॅटू गोंदवून घेण्यासाठी आर्टिस्टकडे गर्दी करत आहेत.
स्वतंत्र विचारांची आणि स्वतःच्या मतांवर ठाम असणारी ‘मीनल’ तापसीने ‘पिंक’मध्ये सहज साकारली आहे. तापसीनं कॉलर बोनवर केलेल्या टॅटूमधून एका पक्ष्याच्या उडण्याच्या चार पायऱ्या दिसतात. सुरुवातीला तो पक्षी, मग त्यानं पसरवलेले पंख आणि नंतर उडण्यासाठी घेतलेली भरारी अशी या टॅटूची संकल्पना आहे. या टॅटूतून दिग्दर्शक अनिरुद्ध रॉय चौधरीला तिचं व्यक्तिमत्त्व सांगायचं होतं. आपल्याला जे विचार पटतात ते टॅटूच्या माध्यमातून दाखवण्यासाठी सेलिब्रेटी प्रयत्नशील असतात. त्याचंच अनुकरण करण्याकडे सध्याच्या तरुणांचा कल आहे. तापसीच्या टॅटूनंही तरुणींना भुरळ घातली असून, आपल्याही कॉलर बोनवर असा टॅटू हवा म्हणून टॅटूमेकरकडे गर्दी होऊ लागली आहे.
केवळ तापसीच नाही, तर इतर बॉलिवूड आणि हॉलिवूड कलाकारांच्याही टॅटूचंही अनुकरण चाहत्यांकडून केलं जातं. ‘मी १६ वर्षांपासून टॅटू आर्टिस्ट म्हणून काम करतो आहे. आजवरच्या माझ्या अनुभवात ऋतिक रोशन आणि सुझान यांनी केलेल्या ‘स्टार’च्या टॅटूला सर्वाधिक मागणी असल्याचं दिसून आलंय. येणाऱ्या ग्राहकांपैकी अंदाजे ८० टक्के लोक हा टॅटू करून घेतात. त्याचबरोबर प्रियांका चोप्राच्या ‘डॅडीज् लिटल गर्ल’, ड्वायने जॉन्सन आणि विराट कोहली यांनी दंड भरून कोरलेल्या टॅटूंनाही तितकीच लोकप्रियता आहे,’ असं टॅटू मेकर राहुल गायकवाड सांगतो.


टॅटू करण्यामागे दरवेळी कोणता तरी विचार दडलेला असतोच असं नाही. बॉलिवूड स्टारच्या फॅशन ट्रेंडचं अनुकरण करण्यासाठी मागणी सर्वाधिक असते. स्वतःची कल्पनाशक्ती लढवून टॅटू कोरून घेणारे तसे कमी आहेत. जेव्हा ‘रंग दे बसंती’ सिनेमा आला होता, तेव्हा ‘खंडा’ या टॅटूसाठी मोठ्या प्रमाणात मागणी होती. पिंकच्या पार्श्वभूमीवर सध्या कॉलर बोनवरील टॅटूची क्रेझ आहे. माझ्याकडे तीन ते चार मुलींनी आत्तापर्यंत असा टॅटू कोरून घेतलाय.
- राहुल गायकवाड, टॅटू मेकर आणि पिअर्सिंग आर्टिस्ट