अ‍ॅपशहर

हा आव्वाज कुणाचा?

टीव्हीवर सध्या सुपरस्टार रणबीर कपूरची रंगांची एक जाहिरात भलतीच गाजते आहे. या जाहिरातीमध्ये गायक म्हणून दिसणाऱ्या रणबीर कपूरच्या आवाजाचं खूप कौतुक होतंय. हा आवाज आहे डॉ. राहुल जोशी या मराठी कलाकाराचा.

Maharashtra Times 17 Jan 2017, 2:15 am
ज्ञानेश्वरी वेलणकर, कॉलेज क्लब रिपोर्टर
महाराष्ट्र टाइम्स.कॉम dr rahul joshi
हा आव्वाज कुणाचा?


टीव्हीवर सध्या सुपरस्टार रणबीर कपूरची रंगांची एक जाहिरात भलतीच गाजते आहे. या जाहिरातीमध्ये गायक म्हणून दिसणाऱ्या रणबीर कपूरच्या आवाजाचं खूप कौतुक होतंय. हा आवाज आहे डॉ. राहुल जोशी या मराठी कलाकाराचा. जवळपास ९० सेकंदाच्या या जाहिरातीत ६० ते ७० सेकंद हा आवाज प्रेक्षकांना ऐकायला मिळतो. यात मल्हार राग गातानाच राहुलने त्याला थोडा फिल्मी टच देखील दिला आहे. त्याच्या आवाजाची दखल आंतरराष्ट्रीय स्तरावरही घेण्यात आली असून, एक संपूर्ण आंतरराष्ट्रीय आल्बम करण्याची ऑफर त्याला मिळाली आहे.

व्यवसायाने डॉक्टर असलेल्या राहुलने होमियोपॅथीमध्ये एमडी केलं आहे. त्याचबरोबर राज्यपालांचा चिकित्सक म्हणून आणि मुंबई पोलिसांचे डॉक्टर म्हणून देखील तो काम करतो. आठवड्यातले दोन दिवस तो विद्यापीठात प्रोफेसर म्हणून विद्यार्थ्यांना शिकवतो. लहानपणापासून घरातच त्याच्यावर सुरांचे संस्कार झाले आणि १७ ते १८ वर्षांच्या मेहनतीनंतर त्याला हा मोठा ब्रेक मिळाला आहे. सुरुवातीला पंडित माधव भातखंडे यांच्याकडे गाण्याचे धडे गिरवल्यानंतर त्याने संगीतात डिप्लोमा व डिग्री संपादन केली. मुंबई विद्यापीठातर्फे त्याला दोनदा सुवर्णपदक देखील मिळालं आहे. त्याचबरोबर पुढे त्याने संगीतात एमए व विशारददेखील केलं आहे.

पंडित नारायणराव बोडस, पंडित जानोरीकर, पंडित सत्यशील देशपांडे आणि उस्ताद इब्राहीम दुर्वेश यांच्याकडे देखील गाण्याचं शिक्षण घेतलं आहे. या जाहिरातीतल्या त्याच्या आवाजाचं सध्या खूप कौतुक होत असून, सोशल मीडियावर त्याचा गाण्याला हजारोंमध्ये लाईक्स, कमेंट्स आणि व्ह्यूज मिळाले आहेत. खुद्द रणबीरनेही त्याच्या गाण्याची प्रशंसा केली आहे. 'तुमचा आवाज रणबीरला अगदी शोभतो आहे' अशा शब्दांत त्याचं कौतुक होतंय.

गाण्याच्या क्षेत्रात जे काही करू शकलो ते माझ्या बाबांमुळे. लहानपणी अनेक दिग्गज मंडळी घरी यायची. त्यांचे सूर कानावर पडून मला संगीताची आवड निर्माण झाली. आता माझं गाणं लोकांनी उचलून धरलं आहे याचा खूप आनंद होतोय. या मोठ्या ब्रेकमुळे अजून काहीतरी चांगलं काम करून दाखवण्याची उर्मी निर्माण झाली आहे.
डॉ. राहुल जोशी

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज