आमच्या सांता ‘त्या’च

अस्मिता कदम, कॉलेज क्लब रिपोर्टर

प्रेमळ नाताळबाबाचं लहान मुलांपासून ते मोठ्यांपर्यंत सर्वांनाच आकर्षण असतं. पण दहिसरमध्ये राहणाऱ्या काही गरीब लहान मुलांसाठी मात्र त्या दोघीच सांता आहेत.

पांढरी दाढी आणि लाल कपड्यांतला सांताक्लॉज येतो आणि मुलांना भरपूर खाऊ, खेळणी देऊन जातो अशी गोष्ट मुलांना सांगितली जाते. त्यामुळे या
या प्रेमळ नाताळबाबाचं लहान मुलांपासून ते मोठ्यांपर्यंत सर्वांनाच आकर्षण असतं. पण दहिसरमध्ये राहणाऱ्या काही गरीब लहान मुलांसाठी मात्र त्या दोघीच सांता आहेत. त्यांनी खराखुरा सांता तर पाहिलेला नाही. पण या दोघीजणी त्यांच्यासाठी सांताच्या रुपातच येतात आणि त्यांना हवं ते देऊन त्यांच्या चेहऱ्यावर हास्य आणतात. पूजा शिंदे आणि तन्वी परब अशी या दोघींची नावं आहेत.

तन्वी आणि पूजा या दोघीही जे.जे. स्कूल ऑफ आर्टसच्या विद्यार्थिनी आहेत. या दोघीही त्यांना मिळणाऱ्या पॉकेटमनीतून पैसे वाचवून ते साठवतात. या साठवलेल्या पैशांतून त्या मुलांसाठी खाऊ आणि खेळणी घेऊन जातात. तीन-चार वर्षांपासून त्या हा उपक्रम राबवत आहेत. तन्वी आणि पूजाचं हे काम पाहून या उपक्रमामध्ये त्यांचे काही मित्र-मैत्रीणीदेखील सहभागी झालेत. पेन्सिलबॉक्स, कप केक्स, चॉकलेट्स, स्केच बुक्स आणि स्केच पेन्स या वस्तू त्या मुलांना देतात. विशेष म्हणजे स्केचबुक्स आणि चॉकलेट्स तर त्या घरीच बनवतात. या सगळ्याला त्यांच्या आई-वडिलांचा त्यांना पांठिबा असतो. 'एक व्हीडीओ बघून मी प्रेरीत झाले. त्यात दाखवल्याप्रमाणे आपण आपल्या परिसरातील गरीब मुलांसाठी काही तरी करावं या उद्देशाने मी हा उपक्रम सुरु केला. दुसऱ्यांना आनंद वाटल्याने आपला आनंद वाढतो हे म्हणतात ते खरंच आहे. हे सध्या मी अनुभवत आहे', असं पूजा सांगते.