पार्टी अभी बाकी है!

दीपश्री आपटे, कॉलेज क्लब रिपोर्टर

नवीन वर्षाच्या स्वागतासाठी तुम्हीही काही ना काही प्लॅन नक्कीच केला असेल. घरीच, हॉलमध्ये किंवा गच्चीवर एखादी पार्टी, गेटटुगेदर करायचं ठरवत असाल, तर ही पार्टी झकास होण्यासाठी एखादी थीम तुम्ही ठेवू शकता. या थीममुळे तुमची पार्टी रंगतदार होऊ शकेल. थीम्सचे असेच काही पर्याय खास तुमच्यासाठी…

रेट्रो स्टाइल
नवीन वेगवेगळ्या कितीही गोष्टी आल्या तरी 'जुनं ते सोनं'! यंदा तुमच्या पार्टीसाठी अशीच काहीशी थीम घेऊ शकता. ड्रेसपासून डेकोरेशनपर्यंत आणि गाण्यांपासून खाण्यापर्यंत प्रत्येक गोष्ट 'रेट्रो स्टाइल'ने ठेऊन मस्त एन्जॉय करता येईल.

बोन फायर
घरी किंवा हॉलऐवजी लॉन किंवा मोकळ्या जागी पार्टी प्लॅन करत असाल तर बोन फायर हा उत्तम पर्याय ठरेल. बोन फायर बरोबर बारबीक्यूचा बेत ठेऊ शकता. शिवाय बंदिस्त जागी पार्टी करण्यापेक्षा मोकळ्या जागी केलेली पार्टी अधिक रंगतदार होईल. थंड ठिकाणी पार्टी करणार असाल तर गुलाबी थंडीत बोन फायरचा आनंदही घेता येईल.

करा आणि खा!
पार्टी म्हंटल की हमखास बाहेर खाण्याची ऑर्डर दिली जाते. अलीकडे पार्टीच्या निमित्ताशिवायही बाहेर खाणं होतं. यंदा मात्र नवं वर्षाचं स्वागत तुम्ही स्वतः आणि तुमच्या पार्टीला येणाऱ्या पाहुण्यांनी बनवलेला पदार्थ खाऊन सेलिब्रेशन करू शकता. थोडक्यात पॉट लक ही थीम घेऊन पार्टी करता येईल. पार्टीला येणाऱ्या प्रत्येकाने स्वतः एखादा पदार्थ बनवून आणायचा आणि नंतर एकत्र मिळून सगळ्यांनी त्यावर ताव मारायचा, असं या पॉट पार्टीचं स्वरूप असतं. यामुळे तुम्हाला वेगवेगळे पदार्थही मिळतील आणि तुमच्या पाहुण्यांच्या हातची चवही चाखता येईल. यात पदार्थ बनवून आणण्यासाठी एखादी थीम देऊ शकता.

दिसा हटके
एखादी थीम दिली की त्या थीमला अनुसरूनच सगळ्यांना ड्रेसअप व्हावं लागतं. त्यापेक्षा ज्याला जे आवडेल त्याप्रमाणे ड्रेसअप होऊन पार्टीत सहभागी होण्याची संधी द्या. पार्टीत हटके तयार होऊन आलेल्या व्यक्तीसाठी एखादं गिफ्ट ठेवू शकता. यात नवीन वर्षाच्या संकल्पासंबधित एखादा गेम ठेवता येईल.

गाणी तुमच्या आवडीची
पार्टी आणि गाणी हे समीकरण उत्तम आहे. एखादा डीजे बोलवून गाणी लावण्यापेक्षा तुमच्या आणि तुमच्या पाहुण्यांच्या पसंतीची गाणी लावा. त्यांच्या पसंतीची गाणी त्यांना आणायला सांगू शकता किंवा पार्टीआधी पाहुण्यांची आवड लक्षात घेऊन गाण्यांची अरेंजमेंट करता येईल.