नियमित एक टोमॅटो खाल्ल्यासही त्वचेला पोषण तत्त्वांचा पुरवठा होण्यास मदत मिळते. टोमॅटोच्या सेवनामुळे त्वचेवर नैसर्गिक चमक येते. या लेखाद्वारे आपण टोमॅटो खाण्याचे तसंच चेहऱ्यावर लावण्याचे फायदे जाणून घेणार आहोत.
टॅनिंगची समस्या होते दूर
- टोमॅटोमधील गुणधर्म आपल्या त्वचेसाठी सनस्क्रीन प्रमाणे कार्य करतात. यातील पोषक घटक सूर्याच्या हानिकारक किरणांपासून आपल्या त्वचेचं संरक्षण करतात. टोमॅटोचं स्लाइस चेहऱ्यावर हलक्या हातानं रगडल्यास सनटॅनची समस्या हळूहळू दूर होण्यास मदत मिळते.
- टोमॅटोमध्ये व्हिटॅमिन सी, व्हिटॅमिन ए, व्हिटॅमिन ई आणि व्हिटॅमिन के ची मात्रा भरपूर प्रमाणात असते. त्वचा नितळ आणि सुंदर राहण्यासाठी ‘व्हिटॅमिन सी’चा शरीराला पुरवठा होणे अतिशय आवश्यक आहे.
- तज्ज्ञांचा सल्ला घेऊन टोमॅटोचा योग्य पद्धतीने उपयोग केल्यास ब्युटी पार्लरमध्ये जाण्याची आवश्यकता भासणार नाही. हा उपाय पूर्णतः नैसर्गिक असल्याने यामुळे त्वचेवर कोणतेही दुष्परिणाम होत नाहीत. त्वचा कोरडी असणाऱ्यांनी टोमॅटोचा उपयोग केल्यानंतर चेहऱ्यावर मॉइश्चराइझर लावावे.
तेलकट त्वचेसाठी लाभदायक
टोमॅटोमधील पोषक घटक तेलकट त्वचेसाठी औषधाप्रमाणे कार्य करतात. यातील लायकोपिन हे घटक आपल्या त्वचेसाठी अँटी-ऑक्सिडंट्सच्या स्वरुपात काम करते. धूळ-माती, प्रदूषणामुळे त्वचेचं संरक्षण करण्याचेही काम हे घटक करतात. 'व्हिटॅमिन सी' आणि ‘व्हिटॅमिन ई’मुळे त्वचेवर होणारा सीबमचा अतिरिक्त स्त्राव नियंत्रणात येण्यासही मदत मिळते.
वृद्धत्वाची लक्षणे कमी करण्यासाठी लाभदायक
- काही जणांच्या चेहऱ्यावर लहान वयातच वृद्धत्वाची लक्षणे दिसू लागतात. ही समस्या दूर करण्यासाठी टोमॅटोचे सेवन करणं फायदेशीर ठरू शकते.
- टोमॅटोमधील लायकोपिन नावाचा घटक त्वचेसाठी केरिटीनॉइड्स क्रीम (carotenoids) प्रमाणे कार्य करतो. त्वचेच्या पेशींचे संरक्षणही करतात. यामुळे तुमच्या चेहऱ्यावर हळूहळू नैसर्गिक चमक दिसू लागते.
- पण चेहऱ्यावर टोमॅटो लावल्यानंतर लगेचच सूर्यप्रकाशात जाणे टाळा, कारण यामुळे त्वचेवर दुष्परिणाम होण्याची शक्यता असते.
ब्लॅकहेड्स दूर करण्यासाठी
- टोमॅटोचा योग्य पद्धतीने उपयोग केल्यास त्वचेवरील ब्लॅकहेड्स आणि व्हाइटहेड्सची समस्या दूर होण्यास मदत मिळू शकते.
- टोमॅटो आपल्या चेहऱ्यासाठी अॅस्ट्रिंजेंट प्रमाणे कार्य करते. टोमॅटोमधील अॅसिडिक गुणधर्मामुळे चेहऱ्यावरील मुरुम, डागांची समस्या दूर होण्यास मदत मिळते.
- तसंच डेड स्किनची समस्या देखील सहजरित्या कमी होऊ शकते. यामुळे त्वचा चमकदार आणि मऊ होते.
पचनसंस्थेचं कार्य सुधारुन सौंदर्य खुलते
- सॅलेडमध्येही टोमॅटोचा समावेश करावा. यामुळे शरीराच्या पचनसंस्थेचं कार्य सुरळीत सुरू राहण्यास मदत मिळते. पोट स्वच्छ असल्यास त्वचेशी संबंधित समस्या उद्भवत नाहीत.
- टोमॅटोच्या सेवनामुळे डोळ्यांची चमक वाढते आणि सौंदर्य देखील खुलते. कारण यातील ‘व्हिटॅमिन ए’मुळे दृष्टी उत्तम राहण्यास मदत मिळते आणि डोळ्यांचे स्नायू देखील मजबूत होतात.
- टोमॅटोमधील पोषक घटक शरीरातील हानिकारक-विषारी पदार्थ शरीराबाहेर बाहेर फेकण्याचे कार्य करतात. या प्रक्रियेमुळे त्वचेवर नैसर्गिक चमक येते.
चेहऱ्यावर टोमॅटोचा उपयोग करण्याची योग्य पद्धत
- टोमॅटोचा रस काकडीच्या रसामध्ये मिक्स करा. हे मिश्रण १५ मिनिटांसाठी आपल्या चेहऱ्यावर लावून ठेवा. यानंतर थंड पाण्याने चेहरा स्वच्छ धुऊन घ्यावा. यामुळे तेलकट त्वचेशी संबंधित समस्या दूर होण्यास मदत मिळते.
- सनबर्नची समस्या कमी व्हावी, यासाठी टोमॅटोचे स्लाइस चेहऱ्यावर हलक्या हाताने रगडा. कमीत कमी १५ मिनिटे चेहऱ्याचा मसाज करावा. या उपायामुळे पिगमेंटेशन आणि डागांची समस्या दूर होण्यास मदत मिळते.
- डेड स्किनची समस्या दूर करण्यासाठी वाटीमध्ये साखर आणि टोमॅटोची पेस्ट एकत्र घ्या. ही पेस्ट चेहऱ्यावर लावून हलक्या हाताने मसाज करावा. यामुळे त्वचा चमकदार आणि सुंदर होण्यास मदत मिळते.
- टोमॅटो पेस्ट, बेसन आणि चिमूटभर हळद एकत्र घ्या व चेहऱ्यावर लावा. यामुळे सनटॅनिंगची समस्या हळूहळू दूर होण्यास मदत मिळते. यानंतर चेहऱ्यावर मॉइश्चराइझर क्रीम लावण्यास विसरू नये.
- टोमॅटो लावल्यानंतर त्वचेवर खाज येणे, रॅशेज इत्यादी समस्या उद्भवल्यास हे उपाय करणे टाळावे.
NOTE त्वचेशी संबंधित कोणतेही उपाय करण्यापूर्वी आपल्या ओळखीच्या डॉक्टरांचा सल्ला घेणे आवश्यक आहे. तसंच दुसऱ्या व्यक्तीचे स्किन केअर रुटीन फॉलो करण्याची चूक करू नये.