गूढ शोधणारा रंजक प्रवास

माझे बाबा नेहमी म्हणायचे की, आयुष्य हे पुस्तकाची पाने पलटण्यासारखं असतं… सीडार ली ही १२ वर्षांची मुलगी आयुष्याचं मोठं तत्त्वज्ञान समरलॉस्ट या कादंबरीतून सांगून जाते. अॅली कॉण्डी यांनी ही कादंबरी लिहिली आहे. यातून भेटणारीही ही लहानशा मुलगी आयुष्यात आलेल्या चढउतारांना कसे सामोरे जायचे, याची दिशाच दाखवते. सीडारचे वडील आ‌णि तिचा स्वमग्न भाऊ बेन यांचा एका अपघातात मृत्यू होतो. या धक्क्यामुळे सीडारसोबत तिचं संपूर्ण कुटुंबच पूर्ण कोलमडून जातं. अखेर एका उन्हाळ्यात सीडार, तिची आई आणि आणखी एक आठ वर्षांचा लहान भाऊ आयर्न क्रीक येथे राहायला येतात. नव्या घरात स्थिरस्थावर होत असताना सीडारची लिओसोबत ओळख होते. ओळखीचं रुपांतर मैत्रीत होतं. सीडारला येथील प्रसिद्ध समरलॉस्ट थिएटर फेस्टिव्हलमध्ये नोकरी मिळते. तेथे लिओही कामाला असतो. सीडारला या नव्या शहरात नवा मित्र, नवी नोकरी मिळते. त्याचबरोबर एक गूढही तिच्याभोवती फिरत असतं. हे गूढ असतं प्रसिद्ध अभिनेत्रीच्या मृत्यूचं. तिच्या रहस्यमय मृत्यूचं कारण शोधण्याचा ध्यास सीडार आणि लिओ घेतात. तिच्याविषयी अधिकाधिक माहिती गोळा करण्याचा प्रयत्न करतात. त्यांचा हा प्रयत्न लेखिकेने रंजक पद्धतीने मांडला आहे. हे रहस्य काय असतं, ते शोधण्यासाठी सीडार काय करते, हे खूप छान पद्धतीने मांडले आहे. ही कादंबरी काही ठिकाणी गंभीर होते. तर काही ठिकाणी रहस्यमय, तर काही ठिकाणी दुःखद. पण तरीही पुढे काय, हे शोधताना त्यात अक्षरशः गढून जायला होतं.

- ऋतुजा सावंत rutuja.sawant@timesgroup.com