मनोरंजन आणि प्रबोधनही

गणेशोत्सव म्हणा किंवा शाळा, सोसाटीतील अन्य कोणत्याही कार्यक्रमात व्यासपीठावर जाऊन सादरीकरण करण्यासाठी तुमच्यापैकी अनेक जण जय्यत तयारी करत असतील. अर्थात बक्षीस हा पुढचा भाग. पण स्पर्धांची मजा वेगळीच. नाटक, सामूहिक नृत्याच्या तालमी म्हणजे धमालच. त्यातही नाटक बसवायचं असेल, तर स्किट शोधण्यापासून वेशभूषेपर्यंत सगळ्याच गोष्टींसाठी धावपळ करावी लागते. पण सुनंदा उमर्जी यांनी नाटिकांचा एक छान पर्याय उपलब्ध करून दिला आहे. त्यांनी लिहिलेल्या बहारदार नाटिका या पुस्तकात एकूण आठ नाटिका आहेत. मनोरंजनासोबत ज्ञान, सामाजिक जाणीव रुंदावण्याचा प्रयत्न या नाटिकांमधून करण्यात आला आहे. या नाटिकांमधील प्रत्येक व्यक्तीरेखा जवळची वाटते. संवादही अगदी मोकळे, रोजच्या जगण्यातील आहेत.

लहान-लहान वाक्य असल्याने कुठेही दमछाक होत नाही. या संवादांना एक प्रकारची लय आहे. यातील पहिलीच नाटिका आहे, मला नाही वेळ. यामध्ये कोकिळा हे मुख्य पात्र असून तिला खेळण्यासाठी सवंगडी हवे असतात. हे सवंगडी शोधताना इतर प्राण्यांचे महत्त्व लेखिकेने अधोरेखित केले आहे. नवल घडले, या नाटिकेत चालू न शकणा-या मुलीची कथा रेखाटली आहे. ही मुलगी चालू कशी लागते, हे वाचणे औत्स्युक्याचे ठरते. अबोली बोलू लागली, या नाटिकेत कला काय काय साध्य करू शकते, हे मांडले आहे. चुकलंच आमचंमध्ये गणपती बनून मुलांना अभ्यासाचे महत्त्व सांगणारा महेश साकारलाय. अहिल्याबाईंची शौर्यगाथा असलेले अबला बने सबला आणि साने गुरुजींच्या स्वर्गातील माळ कथेवरील नाटिकाही खरोखरच बहारदार आहे. केवळ नाटिका बसवण्याच्या उद्देशाने नव्हे, तर बालनाट्य वाचनासाठीही हा चांगला पर्याय आहे.

- ऋतुजा सावंत

rutuja.sawant@timesgroup.com