सुमात्रा वाघ ही वाघाची प्रजात फक्त इंडोनेशियाच्या सुमात्रा बेटांवर आढळते. आजच्या घडीला या जातीचे फक्त ४०० वाघ शिल्लक आहेत. १९७८मध्ये या वाघांची संख्या एक हजार होती. सध्या अस्तित्वात असलेल्या वाघांच्या प्रजातींपैकी सुमात्रा वाघ हा सर्वात लहान आकाराचा वाघ आहे. नारिंगी रंगावर ठळक काळ्या रंगाचे पट्टे हे या वाघाचे वैशिष्ट्य. घटती जंगले आणि शिकारीमुळे या वाघाच्या अस्तित्वाला धोका निर्माण झाला आहे.
ल्होत्से
हिमालयातील ल्होत्से हे एव्हरेस्ट, केटू, कांगचेनजुंगा यानंतर जगभरातील चौथ्या क्रमांकाचे सर्वोच्च शिखर आहे. या शिखराची उंची आहे ८,५१६ मीटर. ल्होत्से हे शिखर एव्हरेस्टच्या रांगेचाच एक भाग असून साऊथ कोलने ते एव्हरेस्टला जोडले आहे. ल्होत्से या तिबेटी शब्दाचा अर्थच दक्षिणेकडील शिखर असा होतो. ८,५१६ मीटरच्या ल्होत्से मुख्य शिखरासह ल्होत्से मध्य (८,४१४ मीटर) आणि ल्होत्से शार (८,३८३) या अन्य शिखरांचाही समावेश आहे. तिबेट आणि नेपाळमधील खुंबू भागाच्या दरम्यान हे शिखर आहे.