‘हरहर महादेव’च्या जयघोषाने दुमदुमले अंबरनाथ

म. टा. वृत्तसेवा, अंबरनाथ

महाशिवरात्रीनिमित्त देशभरात दहशतवादी हल्ल्याबाबत अॅलर्ट जारी करण्यात आला असताना, अंबरनाथ येथील प्राचीन शिवमंदिर ‘हरहर महादेव’च्या जयघोषाने दुमदुमले. यंदाची शिवरात्र सोमवारी आल्याने यात्रेचे महत्त्व अधिक होते. लाखो भाविकांनी दुपारपासूनच दर्शनास रांगा लावल्या होत्या. रविवारी मध्यरात्री १२ वाजता मंदिरात महादेवाला अभिषेक आणि पूजाविधी पार पडल्यानंतर रांगेत उभ्या असलेल्या भाविकांना मंदिरात दर्शनासाठी प्रवेश देण्यात आला होता.

यात्रेदरम्यान कुठलाही अनुचित प्रकार घडू नये म्हणून चोख पोलिस बंदोबस्त ठेवला होता. मंदिर परिसर, तसेच यात्रेच्या मार्गावर सीसीटीव्ही लावण्यात आले होते. यंदा मंदिराला आकर्षक रोषणाई केल्याने सौंदर्यात अधिक भर पडली होती. मात्र दरवर्षीप्रमाणे यात्रेपूर्वी मंदिर पाण्याने धुण्याच्या परंपरेला यंदा पुरातत्त्व विभागाने परवानगी नाकारली. सोमवारी रात्रीपर्यंत अंदाजे पाच लाखांहून अधिक भाविकांनी यात्रेला भेट दिली होती.