श्रीरामपूर नगरपालिकेत १४ कोटींचा घोटाळा

अहमदनगरः कामाची बनावट बिले तयार करून श्रीरामपूर नगरपालिकेतून सुमारे १४ कोटी रुपये काढून फसवणूक केल्याप्रकरणी श्रीरामपूर शहर पोलिस ठाण्यात गुन्हा नोंदविण्यात आला आहे. तत्कालीन नगराध्यक्ष, मुख्याधिकारी, बांधकाम अभियंता यांच्यासह सात जणांविरुध्द गुन्हा नोंदविण्यात आला आहे. कोल्हापूर, ठाणे येथील दोन कंपन्यांची नावे गुन्ह्यात आहेत.
तत्कालीन काँग्रेसच्या नगराध्यक्षा राजश्री ससाणे, तत्कालीन मुख्याधिकारी सुमंत मोरे, तत्कालीन मुख्याधिकारी संतोष खांडेकर, बांधकाम अभियंता सुर्यकांत गदवळी, राजेंद्र सुतावणे, लक्ष्मी सिव्हिल इंजिनिअरिंग (कोल्हापूर), दहासहस्त्र सोल्युशन (ठाणे) यांच्याविरुध्द गुन्हा नोंदविण्यात आला आहे.

सामाजिक कार्यकर्ते केतन खोरे यांनी हा घोटाळा उघडकीस आणला. त्यांच्या फिर्यादीवरून गुन्हा नोंदविण्यात आला आहे. श्रीरामपूर शहरातील भुयारी गटार योजनेतील सांडपाणी प्रक्रिया प्रकल्पाच्या पंपिंग स्टेशनसाठी जागा उपलब्ध नव्हती. त्याचे काम पूर्ण होण्यापूर्वीच मेकॅनिकल इलेक्ट्रिकल वर्कची बीले या सर्वांनी काढून घेतली होती. कुठलेही कामे न करता बनावट बिले तयार करून १३ कोटी ९३ लाख ८४ हजार रुपये नगरपालिकेतून काढून सरकारची फसवणूक केली होती. २०१५-१६ मध्ये हा घोटाळा झाला होता. फसवणूक प्रकरणी बुधवारी मध्यरात्री हा गुन्हा नोंदविण्यात आला आहे.